முதல்முறையாக ரஷியா-உக்ரைன் நேரடி பேச்சு

கடந்த 2022-ஆம் ஆண்டுக்குப் பிறகு உக்ரைன் போர் தொடர்பாக ரஷியாவுக்கும் உக்ரைனுக்கும் இடையே நேரடி பேச்சுவார்த்தை துருக்கியின் இஸ்தான்புல் நகரில் வெள்ளிக்கிழமை நடந்தது.

- 

இஸ்தான்புல், மே 16:

இரண்டு மணி நேரத்துக்குள் முடிந்துவிட்டாலும், இதுவரை இல்லாத மிகப் பெரிய கைதிகள் பரிமாற்ற ஒப்பந்தம் இந்தப் பேச்சுவார்த்தையில் மேற்கொள்ளப்பட்டுள்ளது.

இது குறித்து ரஷிய பேச்சுவார்த்தைக் குழு தலைவர் விளாதிமீர் மெதின்ஸ்கி கூறியதாவது: தற்போது நடந்து முடிந்துள்ள இந்தப் பேச்சுவார்த்தை, உக்ரைன் போரை முடிவுக்குக் கொண்டு வருவதற்காக கடந்த 2022-ஆம் ஆண்டு தொடங்கப்பட்ட முயற்சியின் ஒரு பகுதி. உக்ரைனால்தான் இந்த முயற்சிக்கு முட்டுக்கட்டை ஏற்பட்டிருந்தது.

இந்தப் பேச்சுவார்த்தையின் போது ரஷியாவும் உக்ரைனும் தலா 1,000 போர்க் கைதிகளை பரிமாறிக் கொள்ள ஒப்புக் கொண்டன.

போர் தொடங்கியதற்குப் பிறகு இவ்வளவு பெரிய கைதிகள் பரிமாற்ற ஒப்பந்தம் மேற்கொள்ளப்பட்டுள்ளது இதுவே முதல்முறை.

இந்தப் போருக்கு நிரந்தர முடிவு காண்பதும், அதற்கு ஏதுவாக அடிப்படை பிரச்னைகளுக்கு தீர்வு காண்பதுமே தற்போது நடைபெற்ற பேச்சுவார்த்தையின் முக்கிய நோக்கங்களாக இருந்தன.

இந்தப் பேச்சுவார்த்தையை ரஷியா ஆக்கபூர்வமாக அணுகுகிறது. தேவைப்பட்டால் சில விவகாரங்களில் சமரசம் செய்துகொள்ளவும் ரஷியா தயாராக இருக்கிறது.

உக்ரைன் முன்வைத்துள்ள 30 நாள் போர் நிறுத்தம் குறித்து இந்தப் பேச்சுவார்த்தையின்போது விவாதிக்கப்பட்டது. இருந்தாலும் இறுதி முடிவு எடுக்கப்படவில்லை என்றார் அவர்.

முன்னதாக, ரஷியாவுடனான போரை 30 நாள்களுக்கு எந்த வித நிபந்தனையும் இல்லாமல் நிறுத்தி வைப்பதாக உக்ரைனும் மேற்கத்திய நாடுகளும் கடந்த வாரம் அறிவித்தன.

இது தொடர்பாக மேற்கொண்டு விவாதிப்பதற்காக ரஷியாவுக்கும் உக்ரைனுக்கும் இடையே இஸ்தான்புல் நகரில் வியாழக்கிழமை பேச்சுவார்த்தை நடைபெறுவதாக இருந்தது.