சட்டம்-ஒழுங்கு, போதைப் பொருள்கள் விவகாரம்: முதல்வர்- எதிர்க்கட்சித் தலைவர் கடும் விவாதம்

சட்டம்-ஒழுங்கு, போதைப் பொருள்கள் விற்பனை தொடர்பாக முதல்வர் மு.க.ஸ்டாலின், எதிர்க்கட்சித் தலைவர் எடப்பாடி கே.பழனிசாமி இடையே கடும் விவாதம் நடைபெற்றது.

- 

சென்னை, ஏப்.28:

சட்டப்பேரவையில் காவல் துறை மானியக் கோரிக்கை மீது திங்கள்கிழமை விவாதம் நடைபெற்றது. அதில், எதிர்க்கட்சித் தலைவர் எடப்பாடி கே.பழனிசாமி மற்றும் முதல்வர் மு.க.ஸ்டாலின் இடையே நடைபெற்ற விவாதம்:

எடப்பாடி கே.பழனிசாமி: அதிமுக ஆட்சியில் தமிழ்நாடு காவல் துறை சிறப்பாகச் செயல்பட்டு வந்தது. சட்டத்தின் ஆட்சி உறுதி செய்யப்பட்டது. இன்றைக்கு காவல் துறையின் செயல்பாடு சிறப்பான முறையில் அமையவில்லை. அதிமுக ஆட்சியில் பெண்கள் பாதுகாப்பாக வாழ்வதற்கு உகந்த மாநிலமாக தமிழ்நாடு இருந்தது. இப்போது, அனைத்துவிதமான போதைப் பொருள்கள் விற்கப்படுவது, பெண்களுக்கு எதிரான குற்றச் செயல்கள், கொலை, கொள்ளை சம்பவங்கள் நாளுக்கு நாள் அதிகரித்துக் கொண்டே செல்கின்றன. காவல் துறை வேண்டியவர்களுக்கு ஒரு மாதிரியும், வேண்டாதவர்களுக்கு வேறு மாதிரியும் செயல்படுகிறது.