அறிவியலை ஆராதிப்போம்!

முழுவதும் தேசிய அறிவியல் தினம் பிப்ரவரி 28 ஆம் தேதி ஆண்டுதோறும் கொண்டாடப்பட்டு வருகிறது.

- நாகை பாலா

1928-ஆம் ஆண்டு பிப்ரவரி 28-ஆம் தேதி சர் சி.வி. ராமன் ஒளிச்சிதறலைக் கண்டுபிடித்தார். இது 'ராமன் விளைவு' என்று அழைக்கப்பட்டது. இதற்காக 1930-இல் இயற்பியலுக்கான நோபல் பரிசு வழங்கப்பட்டது. இத்தகைய சிறப்பு மிகுந்த ராமன் விளைவைக் கண்டுபிடித்த நாள் தேசிய அறிவியல் தினமாக 1987-ஆம் ஆண்டு முதல் கொண்டாடப்பட்டு வருகிறது. ஒவ்வோர் ஆண்டும் ஒவ்வொரு தலைப்போடு கொண்டாடப்படுகிறது. இந்த ஆண்டு 'நிலையான வளர்ச்சிக்கான அறிவியல்: பசுமை தொழில்நுட்பங்களை மேம்படுத்துதல்' என்ற தலைப்பில் கொண்டாடப்படுகிறது.

அறிவியல் என்பது எப்படி கற்பிக்கப்படுகிறது? எப்படி கற்றுக் கொள்ளப்படுகிறது? என்பதில் ஒரு நாட்டின் வளர்ச்சி மறைந்திருக்கிறது. நம் நாட்டில் பெரும்பாலும் பள்ளிகளில் ஒன்பதாம் வகுப்பு வரை அறிவியலில் செய்முறைகளுக்கு அதிக முக்கியத்துவம் அளிப்பது கிடையாது. மதிப்பெண்கள் சார்ந்துதான் கற்பித்தல் நடைபெறுகிறது. ஒரு மதிப்பெண் வினாக்களுக்கு எப்படி விடை அளிப்பது ஐந்து மதிப்பெண் வினாக்களுக்கு எப்படி விடை அளிப்பது என்ற ரீதியில்தான் அறிவியல் கற்பிக்கப்படுகிறது. பாடங்களில் உள்ள அறிவியல் கருத்துகளை மனப்பாடம் செய்வதும் அதை தேர்வில் எழுதுவதும் அறிவியலை வளர்க்கப் பயன்படாது. ஒரு மாணவனுக்கு ஆராய்தல் என்ற மனப்பான்மையை ஏற்படுத்தி விட்டால் அவனுக்கு அறிவியல் மிக எளிதாக கைவசமாகும்.