தில்லி பல்கலை. மாணவர் சங்க தேர்தல்: மாணவர் அமைப்புகளின் தேர்தல் அறிக்கைகள் வெளியீடு

தில்லி பல்கலைக்கழக மாணவர் சங்கம் (டியு எஸ்யு) தேர்தலுக்கான வாக்குறுதிகளை காங்கிரஸ் மாணவர் அமைப்பான என்எஸ்யுஐ, இடதுசாரி கூட்டணியான எஸ்எஃப்ஐ-ஏஐஎஸ்ஏ, ஆர்எஸ்எஸ் மாணவர் அமைப்பான அகில பாரதிய வித்யார்த்தி பரிஷத் (ஏபிவிபி) சனிக்கிழமை வெளியிட்டன.

- 

புது தில்லி, செப்.13:

மாணவர்களுக்கு குறைந்த விலையில் மெட்ரோ பாஸ்கள், மருத்துவ காப்பீடு, மாற்றுத்திறனாளி மாணவர்களுக்கான சிறப்பு உதவிகள் உள்ளிட்டவை ஏபிவிபி யின் தேர்தல் அறிக்கையில் இடம் பெற்றுள்ளன.

மாணவர்களிடமிருந்து பெறப்பட்ட 5,000-க்கும் அதிகமான பரிந்துரைகள் மூலம் தயாரிக்கப்பட்ட இந்தத் தேர்தல் அறிக்கையில் கல்வி, பாதுகாப்பு, மருத்துவம், விளையாட்டு, வேலை வாய்ப்பு ஆகியவற்றுக்கு முக்கியத்துவம் அளிக்கப்பட்டுள்ளதாக அந்த அமைப்பு தெரிவித்துள்ளது.

தில்லியில் சனிக்கிழமை நடைபெற்ற செய்தியாளர்கள் சந்திப்பில் தேர்தல் அறிக்கை வெளியிடப்பட்டது. இதில் ஏபிவிபி தேசிய பொதுச் செயலர் வீரேந்திர சிங் சோலங்கி, தேசிய செயலர் சிவாங்கி கார்வல், தில்லி பிரிவு செயலர் சர்தாக் சர்மா மற்றும் வேட்பாளர்கள் பங்கேற்றனர்.