கேரள பேரவையில் எதிர்க்கட்சிகள் 2-ஆவது நாளாக அமளி

சபரிமலை துவார பாலகர் சிலை விவகாரம்

- 

கேரள மாநிலம், சபரிமலை ஐயப்பன் கோயிலின் நுழைவாயிலில் உள்ள துவார பாலகர் சிலைகள் மீது பொருத்தப்பட்டிருந்த தங்க முலாம் பூசிய செப்புத் தகடுகளின் எடை குறைந்ததாக எழுந்த குற்றச்சாட்டில் தேவஸ்வம் துறை அமைச்சர் வி.என். வாசவன் பதவி விலகக் கோரி காங்கிரஸ் உள்ளிட்ட எதிர்க்கட்சிகள் பேரவையில் இரண்டாவது நாளாக செவ்வாய்க்கிழமை அமளியில் ஈடுபட்டன.

இதனால் முதலில் கேள்வி நேரத்தை தற்காலிகமாக ஒத்திவைத்த பேரவைத் தலைவர் ஏ.என். ஷம்சீர், எதிர்க்கட்சிகளின் தொடர் அமளியால் நாள் முழுவதும் பேரவை அலுவல்களை ஒத்திவைத்தார்.

சபரிமலை ஐயப்பன் கோயிலின் கருவறைக்கு இருபுறமும் உள்ள துவார பாலகர் சிலைகளின் தங்க முலாம் பூசப்பட்ட கவசங்களில் செப்பனிடும் பணிக்குப் பின்பாக 4.5 கிலோ குறைந்துவிட்டதாக அண்மையில் வெளியான தகவல் பெரும் பரபரப்பை ஏற்படுத்தியது.