இளைஞர்களின் வாழ்வு சிறக்க...

தற்போதைய படித்த இளைஞர்களிடம் ஏராளமான திறமையும், நேரமும் இருக்கிறது. ஆனால், பணம் இருப்பதில்லை. காரணம், வருமானத்தைக் கொண்டுவரும் வேலை அவர்களுக்கு காலத்தில் கிடைப்பதில்லை. எனவே, நாட்டிலுள்ள வறுமைக்கு அவர்களின் வேலைவாய்ப்பின்மையே ஒரு முக்கியக் காரணமாகத் தெரிகிறது.

- முனைவர் என்.பத்ரி

பொருளாதாரச் சிக்கல்கள், உள்நாட்டுத் தேவையில் சரிவு, அதீத மக்கள்தொகைப் பெருக்கம், கல்வி வசதிகள் பெருகிய அளவுக்கு வேலைவாய்ப்புகள் நாட்டில் பெருகாதது, நாட்டின் மெதுவான பொருளாதார வளர்ச்சி, பெருகிவரும் தொழில்நுட்ப வளர்ச்சி, மோசமான சந்தைக்கொள்கைகள், குறைந்த முதலீடு, தொழில்முனைவோருக்குக் குறைவான வாய்ப்புகள் போன்றவை இளைஞர்களிடையே காணப்படும் வேலைவாய்ப்பின்மைக்கு முக்கியக் காரணங்களாகக் கூறப்படுகின்றன.

தமிழ்நாடு அரசு நலத்திட்டங்களை மக்களுக்கு முறையாகக் கொண்டு சேர்க்கப் பல்வேறு சேவைகளை வழங்கி வருகிறது. இதற்காக அரசு ஊழியர்களும், ஆசிரியர்களும் பணியாற்றி வருகின்றனர். தலைமைச் செயலர் தொடங்கி, அலுவலக உதவியாளர் வரை உள்ள பல்வேறு துறை ஊழியர்கள் இதில் அடங்குவர். இந்த ஊழியர்கள் 60 வயதை நிறைவு செய்யும் நாளன்று ஓய்வு பெறுவது வழக்கம். தற்போதைய நிலையில் தமிழக அரசின் பல்வேறு துறைகளில் 9 லட்சத்து 42 ஆயிரத்து 941 ஊழியர்கள் பணியாற்றி வருகின்றனர்; சுமார் 7 லட்சத்து 33 ஆயிரம் ஊழியர்கள் ஓய்வூதியம் பெற்று வருகின்றனர்.