மார்க்சிஸ்ட் புதிய பொதுச் செயலர் எம்.ஏ.பேபி

மதுரை மாநாட்டில் தேர்வு

- 

மதுரை, ஏப். 6: மார்க்சிஸ்ட் கம்யூனிஸ்ட் கட்சியின் புதிய பொதுச் செயலராக கேரளத்தைச் சேர்ந்த மூத்த தலைவர் எம்.ஏ. பேபி, மதுரையில் ஞாயிற்றுக்கிழமை முடிவடைந்த அந்தக் கட்சியின் 24-ஆவது அகில இந்திய மாநாட்டில் ஒருமனதாகத் தேர்ந்தெடுக்கப்பட்டார்.

கட்சியின் 6-ஆவது பொதுச் செயலரான இவர், இ.எம்.எஸ். நம்பூதிரிபாடுக்குப் பிறகு, கேரளத்திலிருந்து இந்தப் பொறுப்புக்குத் தேர்ந்தெடுக்கப்பட்ட இரண்டாவது தலைவராவார்.

மார்க்சிஸ்ட் பொதுச் செயலர் பதவிக்கு எம்.ஏ.பேபியின் பெயரை கட்சியின் மேற்கு வங்க மாநிலச் செயலர் முகம்மது சலீம் முன்மொழிந்தார். இதை மகாராஷ்டிரத்தைச் சேர்ந்த கட்சியின் மூத்த தலைவர் அசோக் தவாலே வழிமொழிந்தார். இந்தப் பதவிக்கு அசோக் தவாலே போட்டியிடக் கூடும் என எதிர்பார்க்கப்பட்ட நிலையில், பேபியின் பெயரை அவர் வழிமொழிந்தது குறிப்பிடத்தக்கது.