போக்குவரத்து அபராதங்களை கட்ட தவறினால் ஓட்டுநர் உரிமம் தற்காலிக ரத்து

போக்குவரத்து அபராதங்களை கட்டத் தவறினால் ஓட்டுநர் உரிமத்தை தற்காலிகமாக ரத்து செய்தல் உள்பட பல்வேறு நடவடிக்கைகளை அமல்படுத்த மத்திய அரசு திட்டமிட்டு வருவதாக தகவலறிந்த வட்டாரங்கள் தெரிவித்துள்ளன.

- 

புது தில்லி, மார்ச் 31:

போக்குவரத்து விதிமுறைகளை மீறுதல் போன்ற காரணங்களுக்காக இதுவரை வழங்கப்பட்ட மின்னணு ரசீதுகளில் 40 சதவீதம் அளவுக்கே அபராதம் செலுத்தப்பட்டுள்ளதைக் கருத்தில் கொண்டு, இத்தகைய நடவடிக்கைகளை அமல்படுத்த திட்டமிடப்படுகிறது.

இதன்படி, போக்குவரத்து விதிமுறைகளை மீறியதற்காக மின்னணு முறையில் விதிக்கப்படும் அபராதத்தை 3 மாதங்களுக்குள் செலுத்தாதவர்களின் ஓட்டுநர் உரிமம் தற்காலிக ரத்து செய்யப்படக்கூடும்.

மேலும், சிக்னலில் சிவப்பு விளக்கு எரியும்போது கடந்து செல்வது அல்லது ஆபத்தான முறையில் வாகனம் ஓட்டியதற்காக அபராதம் விதிக்கப்பட்டு அனுப்பப்படும் ரசீதுகளின் எண்ணிக்கை ஓரே ஆண்டில் மூன்றாக அதிகரித்தால், சம்பந்தப்பட்டவரின் ஓட்டுநர் உரிமம் குறைந்தபட்சம் 3 மாதங்களுக்குப் பறிமுதல் செய்யப்படக்கூடும்.