பிகாரில் 7.42 கோடி வாக்காளர்கள்

வரைவுப் பட்டியலில் இருந்ததைவிட 17.87 லட்சம் கூடுதல்

- 

நிகழாண்டு இறுதியில் சட்டப்பேரவைத் தேர்தலைச் சந்திக்க உள்ள பிகார் மாநிலத்துக்கான இறுதி வாக்காளர் பட்டியலை தேர்தல் ஆணையம் செவ்வாய்க்கிழமை வெளியிட்டது. அதன்படி, மாநிலத்தில் 7.42 கோடி வாக்காளர்கள் உள்ளனர்.

வாக்காளர் பட்டியல் சிறப்பு தீவிர திருத்தத்துக்கு முன்பாக மாநிலத்தில் வாக்காளர்களின் எண்ணிக்கை 7.89 கோடியாகப் பதிவாகி இருந்த நிலையில், அதிலிருந்து இறுதியாக சுமார் 47 லட்சம் பேர் நீக்கப்பட்டுள்ளனர். 'வாக்காளர் பட்டியலில் தங்களின் பெயர் உள்ளதா என்பதை இந்திய தேர்தல் ஆணைய வலைதளத்தில் உள்ள voters.eci.gov.in என்ற வலைதள தொடர்பைத் திறந்து பார்த்துக் கொள்ளலாம்' என்று பிகார் மாநில தலைமைத் தேர்தல் அதிகாரி தனது சமூக ஊடகப் பக்கத்தில் தெரிவித்தார்.

முன்னதாக, பேரவைத் தேர்தலை முன்னிட்டு பிகார் மாநில வாக்காளர் பட்டியலில் சிறப்பு தீவிர திருத்தப் பணியை தேர்தல் ஆணையம் கடந்த ஜூன் மாதம் மேற்கொண்டது. மாநிலத்தில் 2003-ஆம் ஆண்டுக்குப் பின்னர், வாக்காளராகப் பதிவு செய்துகொண்டவர்கள், தாங்கள் இந்தியர்கள் என்பதை நிரூபிக்க பிறப்புச் சான்றிதழ், கடவுச்சீட்டு (பாஸ்போர்ட்) நகல் போன்ற கூடுதல் ஆவணங்களைச் சமர்ப்பிக்க வேண்டும் என்று அறிவுறுத்தியது.