பூமித்தாயின் ரத்தத்தை குடிக்கும் குவாரி உரிமையாளர்கள்

சென்னை உயர்நீதிமன்றம் வேதனை

- 

சென்னை, ஜூன் 7: பூமித் தாயின் மார்பை அறுத்து ரத்தத்தை குடிப்பவர்களாக குவாரி உரிமையாளர்கள் இருக்கின்றனர் என்று குவாரி விதிமீறல் தொடர்பான வழக்கில் சென்னை உயர்நீதிமன்றம் சனிக்கிழமை வேதனை தெரிவித்தது.

கோவை மாவட்டத்தில், புரவி பாளையம் கிராமத்தில் கே.டி. செந்தாமரை என்பவர் பட்டா நிலங்களில் 2009-ஆம் ஆண்டு முதல் குவாரிகளை நடத்தி வருகிறார். இவரது குவாரிகளில் விதிமீறல் உள்ளதாக ராதாகிருஷ்ணன் என்பவர் சென்னை உயர்நீதிமன்றத்தில் பொதுநல வழக்கு தாக்கல் செய்தார்.

இதையடுத்து, உயர்நீதிமன்ற உத்தரவின் படி அமைக்கப்பட்ட குழு 2021- ஆம் ஆண்டு தாக்கல் செய்த அறிக்கையில் சிறிய அளவில் விதிமீறல் இருப்பதாக கூறப்பட்டது. இதனையடுத்து விதிமீறல் தொடர்பாக நடவடிக்கை எடுக்க உத்தரவிட்டு வழக்கு முடிக்கப்பட்டது. ஆனால், இந்த அறிக்கையை ஆய்வு செய்த கோவை சார் ஆட்சியர், குவாரியில் இருந்து சட்டவிரோதமாக கனிம வளங்கள் எடுத்ததாகக் கூறி செந்தாமரைக்கு ரூ.32 கோடியே 29 லட்சத்து 77 ஆயிரத்து 792 அபராதம் விதித்து 2022-ஆம் ஆண்டு உத்தரவிட்டார்.