திருச்சியில் நடிகர் சிவாஜி கணேசனின் வெண்கலச் சிலை

14 ஆண்டுகளாக திறக்கப்படாததை முதல்வர் திறந்துவைத்தார்

- 

திருச்சி, மே 8: திருச்சியில் அமைக்கப்பட்டு 14 ஆண்டுகளாக திறக்கப்படாமல் இருந்த நடிகர் சிவாஜி கணேசன் சிலையை, தமிழக முதல்வர் மு.க. ஸ்டாலின் வியாழக்கிழமை திறந்து வைத்தார்.

மறைந்த நடிகர் சிவாஜி கணேசனுக்கு 2009-ஆம் ஆண்டு திமுக ஆட்சியில் திருச்சியில் சிலை அமைக்க முடிவு செய்யப்பட்டது. இதன்படி, பிரபாத் ரவுண்டானாவில் 9 அடி உயரத்தில் முழு உருவ வெண்கலச் சிலை நிறுவப்பட்டது. பணிகள் முடிந்து 2011-இல் சிலை திறக்கும் தருணத்தில் ஆட்சி மாற்றம் ஏற்பட்டது. சிலை அமைக்க மாநகராட்சியில் தீர்மானம் நிறைவேற்றப்பட்டிருந்தும் ஆட்சி மாற்றத்தால் சிலை திறப்பு கிடப்பில் போடப்பட்டது.

தொடர்ந்து பல்வேறு தரப்பினர் வலியுறுத்தலை தொடர்ந்து, அண்மையில் நடைபெற்ற பேரவைக் கூட்டத்தில், திருச்சியில் சிவாஜி கணேசன் சிலையை திறக்க முதல்வர் நடவடிக்கை எடுப்பார் என நகராட்சி நிர்வாகத் துறை அமைச்சர் கே.என். நேரு தெரிவித்தார்.

இதையடுத்து உடனடியாக, பாலக்கரையிலிருந்த சிலையை இடமாற்றம் செய்ய நடவடிக்கை எடுக்கப்பட்டது. வார்னர்ஸ் சாலையில் சோனா-மீனா திரையரங்கம் அருகே அமைக்க ஏற்பாடுகள் செய்யப்பட்டன.