பெருந்துயரமாக மாறிய கொண்டாட்டம்!

ங்களூரில் கடந்த புதன்கிழமை நடைபெற்ற ஐபிஎல் கிரிக்கெட் போட்டி வெற்றிக் கொண்டாட்டத்தின் போது 5 பெண்கள் உள்பட 11 பேர் உயிரிழந்தது பெரும் சோகத்தை ஏற்படுத்தியுள்ளது.

- ம.விஸ்வநாதன்

இதில், பெங்களூரில் ஐ.டி. நிறுவனத்தில் பணியாற்றிவந்த, திருப்பூர் மாவட்டம், உடுமலையைச் சேர்ந்த காமாட்சி (28) என்ற இளம்பெண், 14 வயது சிறுவன், 19 வயதுக்குட்பட்ட மூவர், 30 வயதுக்குட்பட்ட 6 பேர் உயிரிழந்துள்ளனர்.

ஐபிஎல் கிரிக்கெட் போட்டி 2008-இல் தொடங்கப்பட்டது. அப்போதிருந்தே, ஒரு குறிப்பிட்ட அணியில் அந்த மாநிலத்தைச் சேர்ந்த ஓர் ஆட்டக்காரருமே விளையாடவில்லை என்றபோதும் இது தனது அணி என்ற எண்ணம் கோடிக்கணக்கான ரசிகர்களின் மனதில் பதிந்து விட்டது.

இப்போது கோப்பையை வென்ற ராயல் சேலஞ்சர்ஸ் பெங்களூரு (ஆர்சிபி) அணியில் பெங்களூரில் வசித்து வரும் மயங்க் அகர்வால் மட்டுமே இறுதி ஆட்டத்தில் விளையாடினார். மற்றவர்கள் அனைவருமே ஒன்று வெளிமாநிலத்தவர் அல்லது வெளிநாட்டவர் என்பது குறிப்பிடத்தக்கது.

18 ஆண்டுகளாக நடைபெற்றுவரும் இப்போட்டியின் இறுதி ஆட்டத்துக்கு ஆர்சிபி அணி இதற்கு முன்னர் 3 முறை தகுதி பெற்றிருந்தாலும் இந்த முறைதான் கோப்பையை வென்றது ரசிகர்களுக்கு பெரும் மகிழ்ச்சியை அளித்தது.