மனிதனைப் புனிதனாக்கும் மனிதநேயம்!

இந்தியாவிலேயே முதல்முறையாக 20,000 சதுர அடியில் திருவண்ணாமலையில் முதுகுத்தண்டுவடம் பாதிக்கப்பட்டவர்களுக்காக 'சோல் ஃப்ரீ சென்டர்' நடத்தி வருகிறார் ப்ரீத்தி சீனிவாசன்.

- இ. சாந்த் உஸ்மானி

இந்தியாவிலேயே முதல்முறையாக 20,000 சதுர அடியில் திருவண்ணாமலையில் முதுகுத்தண்டுவடம் பாதிக்கப்பட்டவர்களுக்காக 'சோல் ஃப்ரீ சென்டர்' நடத்தி வருகிறார் ப்ரீத்தி சீனிவாசன். கல்பனா சாவ்லா விருது பெற்ற முதல் மாற்றுத்திறனாளிப் பெண். "விருது கிடைத்ததைவிட கல்பனா சாவ்லாவின் கணவன் எனக்கு அனுப்பிய செய்தி மிகவும் மகிழ்ச்சியானது" என்கிறார். பலருடைய வாழ்வுக்கு ஒளி விளக்காக உள்ள தன்னம்பிக்கை நிறைந்த பெண் அவர். அவரது தன்னம்பிக்கைக்குக் கிடைத்த அங்கீகாரத்தைவிட, தன்னைப் போல் பாதிக்கப்பட்ட சக மனிதர்கள் மேல் கொண்ட பரிவு, கருணை, அன்பு என எல்லாவற்றையும் உள்ளடக்கிய மனித நேயமே அவரை உலகுக்கு அடையாளம் காட்டியிருக்கிறது.

நாம் அனைவரும் கண்டு வியந்த சகோதரி சபீனா, கேரள வயநாடு நிலச்சரிவில் தன் உயிரையும் பொருட்படுத்தாது சென்று உயிர்களைக் காப்பாற்றிய சிங்கப் பெண். கல்பனா சாவ்லா விருதைப் பெற்றவர். "இந்தக் கரையிலிருந்து அந்தக் கரையில் பார்க்கும்போது ரத்தக் காயங்களுடன் பல உயிர்களைக் கண்ட நான், ஆண்தான் போக வேண்டும், பெண்தான் போக வேண்டும் என்று இல்லையே என்றெண்ணி மனிதநேய அடிப்படையில் சக மனிதர்களைக் காப்பாற்ற வேண்டும் என்ற உத்வேகத்தில் சென்றேன்" என்று கூறும் சபீனா 'சிறந்த ஆளுமை - 2024' என்ற விருதையும் பெற்றிருக்கிறார்.