துணைவேந்தர்கள் மாநாட்டுப் பணியில் ஆளுநர் மாளிகை: சட்ட வல்லுநர்களுடன் தமிழக அரசு தீவிர ஆலோசனை

தமிழக ஆளுநர் நிலுவையில் வைத்த 10 மசோதாக்களுக்கு உச்சநீதிமன்றம் ஒப்புதல் அளித்த நிலையில், பல்கலைக்கழகங்களின் நிர்வாக நடவடிக்கைகளில் ஆளுநருக்கே அதிக அதிகாரங்கள் இருப்பதாக தகவல் வெளியாகியுள்ளது.

- 

சென்னை, ஏப். 21: அவற்றை நிலை நாட்டும் வகையிலேயே உதகையில் துணை வேந்தர்கள் மாநாட்டுக்கு ஆளுநர் அழைப்பு விடுத்துள்ளதாக அவரது மாளிகை தரப்பில் தெரிவிக்கப்பட்டுள்ளது.

பல்கலைக்கழக துணைவேந்தர்கள் நியமன விவகாரத்தில் தமிழக அரசுக்கும் பல்கலைக்கழக வேந்தர் மற்றும் மாநில ஆளுநரான ஆர்.என்.ரவிக்கும் இடையே தொடர்ந்து மோதல் போக்கு நீடித்து வருகிறது. இதைத் தொடர்ந்து துணைவேந்தர்களை நியமிக்கும் அதிகாரத்தை ஆளுநருக்குப் பதிலாக மாநில அரசுக்கு வழங்குவது, பல்கலைக்கழக வேந்தருக்குரிய அதிகாரத்தை ஆளுநருக்கு பதில் அரசுக்கு அளிப்பது, சிண்டிகேட் உறுப்பினர்கள் நியமனம் உள்ளிட்டவை தொடர்பாக தமிழக அரசு சட்டப்பேரவையில் நிறைவேற்றிய 10 சட்ட மசோதாக்களுக்கு ஆளுநர் ஒப்புதல் அளிக்கவில்லை. இதையடுத்து அந்த 10 சட்ட மசோதாக்களை மீண்டும் பேரவையில் நிறைவேற்றி ஆளுநருக்கு அனுப்பி வைத்த நிலையில், அவற்றை அவர் குடியரசுத்தலைவருக்கு பரிந்துரைத்தார்.