உக்ரைன் விவகாரம்: தொலைபேசியில் டிரம்ப்-புதின் இன்று பேச்சு

உக்ரைன் போரை முடிவுக்குக் கொண்டுவருவது குறித்து அமெரிக்க அதிபர் டொனால்ட் டிரம்ப் மற்றும் ரஷிய அதிபர் விளாதிமீர் புதினும் தொலைபேசி மூலம் செவ்வாய்க்கிழமை (மார்ச் 18) பேச்சுவார்த்தை நடத்தவுள்ளனர்.

- 

வாஷிங்டன் / மாஸ்கோ, மார்ச் 17:

இதுகுறித்து ஃபுளோரிடா மாகாணத்தில் இருந்து வாஷிங்டனுக்கு சென்றுகொண்டிருந்த போது தனது ஏர்ஃபோர்ஸ் ஒன் விமானத்தில் இருந்தபடி செய்தியாளர்களிடம் அதிபர் டிரம்ப் கூறியதாவது:

உக்ரைன் போர் நிறுத்தம் தொடர்பான முக்கிய அறிவிப்பு செவ்வாய்க்கிழமை வெளியாவதற்கான வாய்ப்புள்ளது. அந்த நாளில்தான் அதிபர் விளாதிமீர் புதினுடன் தொலைபேசியில் உரையாடவிருக்கிறேன் என்றார் டிரம்ப்.

இந்தத் தகவலை ரஷியாவும் உறுதிப்படுத்தியது. மாஸ்கோவில் திங்கள்கிழமை நடைபெற்ற செய்தியாளர்கள் சந்திப்பில் ரஷிய அதிபர் மாளிகை செய்தித்தொடர்பாளர் டிமித்ரி பெஸ்கோவிடம் இது தொடர்பாக கேள்வி எழுப்பப்பட்டது.

அதற்குப் பதிலளித்த பெஸ்கோவ், 'அமெரிக்க - ரஷிய அதிபர்களுக்கு இடையே தொலைபேசியில் பேச்சுவார்த்தை நடத்தவிருப்பது உண்மைதான். அந்த பேச்சுவார்த்தையை செவ்வாய்க்கிழமை நடத்த திட்டமிடப்பட்டது' என்றார்.