ரஷியா-உக்ரைன் போர்: 4 ஆண்டுகளாகத் தொடரும் பேரழிவு!

ஐரோப்பிய கண்டத்தில் 2-ஆம் உலகப் போருக்குப் பிறகு மாபெரும் மனிதப் பேரழிவை ஏற்படுத்திய ரஷியா-உக்ரைன் போர் 4 ஆண்டுகளை நிறைவு செய்துள்ளது.

- நமது நிருபர்

எனினும், இந்தச் சண்டையில் துப்பாக்கிச் சத்தங்களும், பீரங்கி முழக்கங்களும் இன்னும் ஓயவில்லை. இரு தரப்பிலும் உயிரிழந்தோர், படுகாயமடைந்தவர்களின் எண்ணிக்கை பல லட்சங்களைத் தாண்டியுள்ளது.

போர்க்களத்தில் சிந்தப்படும் ரத்தம், சீர்குலைந்த நகரங்கள், அகதிகளாக வெளியேறிய லட்சக்கணக்கான மக்கள் என உக்ரைனின் இழப்புகள் அதிகமாக இருந்தாலும், போரைத் தொடங்கிய ரஷியாவுக்கும் எதிர்பார்த்ததைவிட களத்தில் மிகப்பெரிய இழப்பு ஏற்பட்டுள்ளது.

சோவியத் யூனியனின் வீழ்ச்சிக்குப் பிறகு மேற்கத்திய நாடுகளுடனான உக்ரைனின் நெருக்கத்தை ரஷியா எப்போதும் விரும்பவில்லை. இச்சூழலில், ஐரோப்பிய யூனியன், நேட்டோ கூட்டமைப்பில் இணைவதற்கான உக்ரைனின் ஆர்வத்தை ரஷியாவுக்கான நேரடி அச்சுறுத்தலாகக் கருதி, படையெடுப்பைத் தொடங்கினார் ரஷிய அதிபர் புதின்.