தேர்தல் முறைகேடுகளுக்கு பெயர்பெற்றது ராகுல் குடும்பம்

வாக்காளர் பட்டியலில் முறைகேடுகள் நடந்திருப்பதாக குற்றஞ்சாட்டியுள்ள தன் மூலம் வாக்காளர் பட்டியல் சிறப்பு தீவிர திருத்தத்தை ராகுல் காந்தி ஆதரித்துள்ளார்; அவரது குடும்பம் தேர்தல் முறைகேடுகளுக்கு பெயர்பெற்றது என்று பாஜக விமர்சித்துள்ளது.

- 

புது தில்லி, ஆக. 14: 'வாக்காளர் பட்டியலில் முறைகேடுகள் நடந்திருப்பதாக குற்றஞ்சாட்டியுள்ள தன் மூலம் வாக்காளர் பட்டியல் சிறப்பு தீவிர திருத்தத்தை ராகுல் காந்தி ஆதரித்துள்ளார்; அவரது குடும்பம் தேர்தல் முறைகேடுகளுக்கு பெயர்பெற்றது' என்று பாஜக விமர்சித்துள்ளது.

இது தொடர்பாக பாஜக மூத்த தலைவரும், மத்திய அமைச்சருமான கஜேந்திர சிங் ஷெகாவத், தில்லியில் செய்தியாளர்களிடம் வியாழக்கிழமை கூறியதாவது: கடந்த ஆண்டு நடைபெற்ற மக்களவைத் தேர்தலின்போது கர்நாடகத்தில் ஒரு தொகுதியில் வாக்காளர் பட்டியலில் பெருமளவு முறைகேடுகள் நடந்திருப்பதாக மக்களவை எதிர்க்கட்சித் தலைவர் ராகுல் காந்தி குற்றம்சாட்டியுள்ளார். அவர் இவ்வாறு குற்றம்சாட்டியுள்ளதன் மூலம் வாக்காளர் பட்டியல் சிறப்பு தீவிர நடவடிக்கையை அவர் ஆதரித்துள்ளார். வாக்காளர் பட்டியலில் நடைபெறும் முறைகேடுகள் குறித்து விசாரணை நடத்தப்பட வேண்டும். ஆனால், அவ்வாறு விசாரணை நடைபெறும்போது ராகுல் முதலைக்கண்ணீர் வடித்து, அதை எதிர்க்கிறார். அவர் இந்த விவகாரத்தில் இரட்டைவேடம் போடுகிறார்.