21 நாள்களுக்குப் பின் இந்திய வீரரை ஒப்படைத்தது பாகிஸ்தான்

பஞ்சாபில் சர்வதேச எல்லையை தவறுதலாக கடந்து சென்றதால் பாகிஸ்தான் படையினரால் கைது செய்யப்பட்ட எல்லை பாதுகாப்புப்படை (பிஎஸ்எஃப்) வீரரை 21 நாள்களுக்குப்பின் இந்தியாவிடம் அந்த நாடு புதன்கிழமை ஒப்படைத்தது.

- 

அமிருதசரஸ், மே 14:

பூர்ணம் குமார் ஷா என்ற அந்த வீரர், அமிருதசரஸ் மாவட்டம், அட்டாரியில் உள்ள கூட்டு சோதனைச் சாவடியில் (பாகிஸ்தானின் வாகா எல்லைக்கு எதிரே) பிஎஸ்எஃப் படையினரிடம் ஒப்படைக்கப்பட்டார். இது தொடர்பான புகைப்படத்தை பிஎஸ்எஃப் வெளியிட்டுள்ளது.

இந்தியா-பாகிஸ்தான் இடையே கடந்த சனிக்கிழமை சண்டை நிறுத்தம் மேற்கொள்ளப்பட்ட நிலையில், பிஎஸ்எஃப் வீரரை பாகிஸ்தான் விடுவித்திருப்பது முக்கியத்துவம் பெற்றுள்ளது.

ஜம்மு-காஷ்மீர் மாநிலம், பஹல்காமில் 26 பேர் கொல்லப்பட்ட பயங்கரவாதத் தாக்குதல் கடந்த ஏப்ரல் 22-ஆம் தேதி நடந்தது. இச்சம்பவத்துக்கு மறுநாள் பஞ்சாப் மாநிலம், ஃபெரோஸ்பூர் எல்லையோரப் பகுதியில் விவசாயிகளுக்கு பாதுகாப்பாகச் சென்றார் பிஎஸ்எஃப் காவலர் பூர்ணம் குமார் ஷா. அப்போது சர்வதேச எல்லையைத் தவறுதலாக கடந்து சென்ற அவரை, பாகிஸ்தான் எல்லை வீரர்கள் கைது செய்தனர்.