நிதிச் சிக்கலில் அண்ணாமலைப் பல்கலைக்கழகம்!

சிதம்பரம் அண்ணாமலைப் பல்கலைக்கழகத்தில் நிலவும் நிதிச் சிக்கல்களால் அதன் ஆசிரியர்கள், ஊழியர்கள், ஓய்வூதியர்களின் வாழ்வாதாரம் கேள்விக்குறியாகியுள்ளது.

- நமது நிருபர்

சிதம்பரம், மே 14: இதனால், பல்கலைக்கழக அனைத்து சங்கங்களின் கூட்டமைப்பினர் 30 நாள்களுக்கும் மேலாக காத்திருப்புப் போராட்டத்தில் ஈடுபட்டு வருகின்றனர்.

அண்ணாமலைப் பல்கலைக்கழகத்தில் நிதி நெருக்கடி, முறைகேடுகள் நடைபெற்றதாக எழுந்த சர்ச்சையைத் தொடர்ந்து, அந்தப் பல்கலைக்கழகத்தை 2013, ஏப்ரல் மாதம் தமிழக அரசு தனது கட்டுப்பாட்டின் கீழ் கொண்டு வந்தது. அதன்படி நிர்வாக அதிகாரியாக ஷிவ்தாஸ் மீனா நியமிக்கப்பட்டு பல்வேறு நடவடிக்கைகள் மேற்கொள்ளப்பட்டன. இருந்தபோதும் இந்தப் பல்கலைக்கழகம் தற்போது நிதிச் சிக்கல்களால் முடங்கியுள்ளதாக மீண்டும் சர்ச்சையில் சிக்கியுள்ளது.

இதுகுறித்து பல்கலைக்கழக ஆசிரியர்கள் கூட்டமைப்பு ஒருங்கிணைப்பாளர் சி.சுப்பிரமணியன் கூறுகையில், ஆசிரியர்கள், ஊழியர்களுக்கு விதிமுறைகளின்படி பதவி உயர்வு, பணப் பலன்களை பல்கலைக்கழகத்தால் வழங்க இயலவில்லை. ஓய்வூதியர்களுக்கு ஓய்வுக்கால பணப் பலன்கள் 2021-ஆம் ஆண்டு முதல் வழங்கப்படவில்லை என்றார்.