பிளஸ் 2 பொதுத் தேர்வில் 95.03% தேர்ச்சி

தமிழில் 135 பேர் சதம்

- 

சென்னை, மே 8: தமிழகத்தில் மாநில அரசின் பாடத் திட்டத்தில் நடைபெற்ற பிளஸ் 2 பொதுத் தேர்வில் 95.03 சதவீத மாணவ, மாணவிகள் தேர்ச்சி பெற்றனர்.

ஒட்டுமொத்த தேர்ச்சி விகிதத்தில் அரியலூர் மாவட்டம் முதலிடம் பிடித்தது. வேலூர் மாவட்டம் கடைசி இடத்தில் உள்ளது.

இதுவரை இல்லாத அளவுக்கு தமிழ்ப் பாடத்தில் 135 பேரும், ஆங்கிலத்தில் 68 பேரும் 100-க்கு 100 மதிப்பெண்கள் பெற்று சாதனை படைத்தனர்.

தமிழகத்தில் பிளஸ் 2 பொதுத் தேர்வு கடந்த மார்ச் 3 முதல் 25-ஆம் தேதி வரை நடைபெற்றது. இத் தேர்வுக்கான முடிவுகளை பள்ளிக் கல்வித் துறை அமைச்சர் அன்பில் மகேஸ் பொய்யாமொழி சென்னை அண்ணா நூற்றாண்டு நூலக அரங்கில் வியாழக்கிழமை காலை வெளியிட்டார்.