பயங்கரவாதம் மீண்டும் தலைதூக்கினால் முழு வீச்சில் பதிலடி

பஞ்சாப் விமானப் படை தளத்திலிருந்து பாகிஸ்தானுக்கு பிரதமர் எச்சரிக்கை

- 

புது தில்லி, மே 13: 'பாகிஸ்தான் வேண்டிக் கேட்டதால், இந்தியாவின் ராணுவ நடவடிக்கை தற்காலிகமாக நிறுத்தப்பட்டுள்ளது. இந்தியாவுக்கு எதிராக மேற்கொண்டு பயங்கரவாத செயல்பாடுகளில் ஈடுபட்டாலோ,ராணுவத் தாக்குதல் நடத்தினாலோ பாகிஸ்தானுக்கு முழு வீச்சில் பதிலடி தரப்படும்' என்று பிரதமர் நரேந்திர மோடி எச்சரிக்கை விடுத்தார்.

பயங்கரவாதிகளைப் பாதுகாக்கும் பாகிஸ்தான் ராணுவத்தை இந்திய முப்படையினர் உறுதியுடன் தோற்கடித்துள்ளனர் என்று அவர் பெருமிதத்துடன் குறிப்பிட்டார்.

பஞ்சாப் மாநிலம், ஆதம்பூர் விமானப் படை தளத்துக்கு செவ்வாய்க்கிழமை காலையில் திடீர் வருகை புரிந்த பிரதமர் மோடி, விமானப் படையின் போர் வீரர்கள் மற்றும் ராணுவ வீரர்களைச் சந்தித்து கலந்துரையாடினார்.

பாகிஸ்தான் எல்லையில் இருந்து சுமார் 100 கி.மீ. தொலைவில் அமைந்துள்ள இந்த விமான படைத் தளம், வியூக ரீதியில் முக்கியத்துவம் வாய்ந்ததாகும். சமீபத்திய இந்திய-பாகிஸ்தான் மோதலுக்கு பிறகு ராணுவ வீரர்களுடன் பிரதமர் முதல் முறையாக கலந்துரையாடியுள்ளார்.