'சமரசம் பேசுவோம்; சரணடைய மாட்டோம்'

ரஷியாவுடன் சமரசப் பேச்சுவார்த்தை மேற்கொள்ள தங்கள் தயாராக இருந்தாலும், அந்த நாட்டிடம் ஒருபோதும் சரணடையப் போவதில்லை என்று உக்ரைன் திட்டவட்டமாகத் தெரிவித்துள்ளது.

- 

ரஷியா - உக்ரைன் போரை முடிவுக்குக் கொண்டுவருவதற்காக இரு நாடுகளுடனும் தனித்தனியாக நடத்திவரும் பேச்சுவார்த்தையில் முன்னேற்றம் ஏற்படாததால் அந்த முயற்சியை முழுமையாகக் கைவிடப் போவதாக அமெரிக்கா மிரட்டல் விடுத்துள்ள நிலையில், உக்ரைன் துணைப் பிரதமர் யூலியா ஸ்விரிடென்கோ இவ்வாறு கூறியுள்ளார்.

இது குறித்து எக்ஸ் ஊடகத்தில் அவர் வெளியிட்டுள்ள பதிவில் தெரிவிக்கப்பட்டுள்ளதாவது:

போர் விவகாரம் குறித்து விவாதிப்பதற்காக நட்பு நாடுகளின் தலைவர்களை எங்களின் பிரதிநிதிகள் தற்போது லண்டனில் சந்தித்துப் பேசிவருகின்றனர். இந்தச் சூழலில் நாங்கள் தெரிவித்துக்கொள்ள விரும்புவது, போர் நிறுத்தப் பேச்சுவார்த்தைக்கு உக்ரைன் எப்போதும் தயாராக இருக்கிறது; ஆனால் ரஷியாவிடம் ஒருபோதும் சரணடையாது.

ரஷியாவுடன் மேற்கொள்ளக் கூடிய எந்த ஒப்பந்தமும், அந்த நாடு தனது படைகளை மீண்டும் திரட்டவும், கூடுதல் பலத்துடன் எங்கள் மீது தாக்குதல் நடத்தவும் அந்த நாட்டுக்கு வாய்ப்பு ஏற்படுத்தித் தருவதாக இருக்கக் கூடாது.

ரஷியாவுடன் போர் நிறுத்த ஒப்பந்தம் ஏற்பட வேண்டுமென்றால் அது முழுமையானதாக இருக்க வேண்டும். தரை, வான், கடல் என்று எந்த வழியான தாக்குதலுக்கும் அது முற்றுப்புள்ளி வைக்க வேண்டும். இதுதான் போரை நிரந்தரமாக முடிவுக்குக் கொண்டுவருவதற்கான முதல்படி.

ஆனால் குறிப்பிட்ட அளவிலான போர் நிறுத்தத்தை மட்டுமே ரஷியா விரும்பினால், உக்ரைனும் அதற்கு எதிர்வினையாற்றும்.