அய்யா வைகுண்டரும் வாக்கு வங்கி அரசியலும்!

தமிழகத்தில் சட்டப்பேரவைத் தேர்தலுக்கு இன்னும் ஓராண்டு உள்ள நிலையில், இப்போதே அரசியல் களம் சூடுபிடிக்கத் தொடங்கியிருக்கிறது.

- எ.வி.பெருமாள்

தமிழகத்தில் சட்டப்பேரவைத் தேர்தலுக்கு இன்னும் ஓராண்டு உள்ள நிலையில், இப்போதே அரசியல் களம் சூடுபிடிக்கத் தொடங்கியிருக்கிறது. எந்தெந்தத் தொகுதிகளில் வாக்காளர்களை எவ்வாறு கவருவது, யாரை வைத்து அரசியல் செய்வது, எந்த விஷயத்தை முன்னிறுத்தி வாக்குகளை ஈர்ப்பது என பல கோணங்களில் அரசியல் கட்சிகள் வியூகம் வகுக்கத் தொடங்கியுள்ளன.

அந்த வகையில், தென் தமிழகத்தில் அரசியல் கட்சிகள் கையில் எடுத்திருக்கிற வியூகம்தான் அய்யா வைகுண்டர். தமிழகத்தில் அய்யா வைகுண்டருக்கு அரசியல் கட்சியினர் அளித்துவரும் முக்கியத்துவம் சமீபகாலமாக அதிகரித்திருக்கிறது. கன்னியாகுமரி மாவட்டம் சாமிதோப்பில் உள்ள அய்யா வைகுண்டர் தலைமைப் பதிக்கு ஆளுநர் முதல் அரசியல் கட்சியினர் வரை பலரும் வந்து செல்வதும், அவரது அவதார தினத்தில் தவறாது வாழ்த்து கூறுவது மட்டுமின்றி, அய்யா வைகுண்டர் தொடர்புடைய நிகழ்ச்சிகளிலும் அவர்கள் பங்கேற்பதும் பரவலான கவனத்தை ஈர்த்துள்ளது.