ધર્મના નામે પથ્થર ફેંકતાં પહેલાં ખરું-ખોટું તો વિચારો...

વકફ બોર્ડને અમાપ સત્તા આપતા કાયદામાં મોદી સરકારે સુધારા કર્યા એટલે દેશમાં ઘણે ઠેકાણે મુસ્લિમો વિરોધ પર ઊતરી આવ્યા અને બંગાળમાં તો આ મામલે તોફાન પણ થયાં. આંખમાં મજહબી ઝનૂન અંજાવીને મોટા થયેલા આ યુવાનોએ હવે નક્કી કરવાનું છે કે એમણે ચોક્કસ ઓળખ સાથે જ જીવવું છે કે જડતાના બંધિયારપણામાંથી બહાર આવવું છે.

- હીરેન મહેતા

ધારણા પ્રમાણે ભલે મોટી આગ ન લાગી, પણ ભડકો તો થયો જ. લોકસભામાં ભાજપ પાસે પૂર્ણ બહુમતી ન હોવા છતાં સાથી પક્ષોની મદદથી મોદી સરકારે સંસદનાં બન્ને ગૃહમાં વકફ સુધારણા ખરડો પસાર કરાવી લીધો ત્યારે અંદેશો હતો જ કે કોઈક વિઘ્નસંતોષી કાંડી ચાંપવાનું કામ કરશે.

વકફ બોર્ડના સંચાલનમાં સુધારણા કરવાથી માંડી મૂળ તો એના અબાધિત અને ઘણે અંશે વિચિત્ર કહી શકાય એવા અધિકારો પર કાપ મૂકવાનો મુદ્દો લાંબા સમયથી ચર્ચાતો હતો. દેશના નકશા પર આંગળી મૂકીને જમીન તાબામાં લઈ શકાતી હોય એટલી સહેલાઈથી વફ્ફ બોર્ડ જમીનના કોઈ પણ ટુકડા પર દાવો ઠોકી દે અને અમુક કિસ્સામાં એ જમીન પર કબજો જમાવી પણ દે એવું આ જમાનામાં આફ્રિકાના જંગલરાજ ધરાવતા દેશોમાં પણ શક્ય નથી. જો કે ભારતમાં એવું પોપાબાઈનું રાજ ચાલતું હતું એ હવે વક્ક સુધારણા કાયદાના અમલ સાથે ભૂતકાળ બની જશે એવી આશા રાખી શકાય.