વિદ્યાર્થિનીઓ જ કરાવે છે શાળાનું નવનિર્માણઃ આવી પણ એક ગુરુદક્ષિણા!

નવીનીકરણ પછી ‘બાલુબા કન્યા વિદ્યાલય'ની આ જર્જરિત ઈમારતનો સુવર્ણ ભૂતકાળ તાજો થશે.

- 

મુક્તિ અપાવે તે વિદ્યા.. સા વિદ્યા યા વિમુક્તિયે એવું પ્રાચીન સૂત્ર આપનારા મોહનદાસ કરમચંદ ગાંધી શાંત, અહિંસક ચળવળો માટે દેશમાં જ નહીં, દુનિયાભરમાં પંકાયા હતા. એવા રાષ્ટ્રપિતા ગાંધીની ભૂમિ પોરબંદરમાં આવી જ એક શાંત, પણ અનોખી ચળવળે સૌકોઈનું ધ્યાન ખેંચ્યું છે. આ ચળવળ એટલે શહેરના હાર્દ સમા વિસ્તારમાં આવેલું બાલુબા કન્યા વિદ્યાલયને બચાવવાની ઝુંબેશ. પડું પડું થઈ રહેલી સ્કૂલના નવીનીકરણ માટે સ્કૂલની પૂર્વ વિદ્યાર્થિનીઓએ એક ઝુંબેશના સ્વરૂપમાં કાર્ય ઉપાડી લીધું છે.

ઔપચારિક શિક્ષણનું પહેલું પગથિયું એટલે પ્રાથમિક શિક્ષણ. છ-સાત વર્ષની વયથી ૧૧-૧૨ વર્ષ દરમિયાન બાળકને જે શિક્ષણ-સંસ્કાર મળે એ આજીવન યાદ રહે છે. આવાં જ શિક્ષણ-સંસ્કાર જ્યાંથી મળ્યાં એ પોરબંદરની ૮૭ વર્ષ જૂની કન્યાશાળાની ઈમારત પાસેથી અહીંની પૂર્વ વિદ્યાર્થિનીઓ પસાર થતી તો ગૌરવ અનુભવતી એવો આ વિદ્યાલયનો ભવ્ય ભૂતકાળ હતો, પરંતુ સમયની થપાટ લાગતાં વર્તમાન વરવો બન્યો અને આજે તો શાળાની ઈમારત તદ્દન જર્જરિત થઈ ગઈ છે. આ હાલત જોયા પછી ભૂતપૂર્વ વિદ્યાર્થિનીઓએ નક્કી કર્યું કે આ શાળાનો વૈભવ આમ અસ્ત થવા નહીં દઈએ.