മണ്ണിന്റെ കൂട്ടുകാരൻ

"ടൈം നെക്സ്റ്റ് 100' പട്ടികയിൽ ഇടം നേടിയ മലയാളി ആർക്കിടെക്ട് വിനു ദാനിയേൽ വനിത വീടിനോട് സംസാരിക്കുന്നു

- സിനു കെ. ചെറിയാൻ

കേരളത്തിന്റെ മാത്രമല്ല, ഇന്ത്യൻ വാസ്തുകലയുടെ തന്നെ വർത്തമാനകാല മേൽവിലാസ മാണ് ആർക്കിടെക്ട് വിനു ദാനിയേൽ പ്രതിഭയുടെ മാന്ത്രികതയാലും നേട്ടങ്ങളുടെ പെരുക്കത്താലും ഇത്രയേറെ വിസ്മയിപ്പിച്ച മറ്റൊരു ആർക്കിടെക്ട് സമീപ ചരിത്രത്തിലില്ല. 2020 ൽ ആർക്ക് ഡെയിലി ലോകത്താകെ നിന്ന് തിരഞ്ഞെടുത്ത 20 യുവ ആർക്കിടെക്ടുമാരുടെ പട്ടികയിൽ ഇടം നേടിയ ഏക ഇന്ത്യക്കാരൻ, 2021 ലെ ബിക് അവാർഡിന്റെ അന്തിമ പട്ടിക യിൽ ഇടംപിടിച്ച ഏക ഇന്ത്യൻ ആർക്കിടെക്ട്, 2022 ലെ റോയൽ അക്കാദമി ഡോർാൻ പുരസ്കാര ജേതാവ്, കഴിഞ്ഞ തവണത്തെ ആഗാ ഖാൻ പുരസ്കാരത്തിനുള്ള നോമിനേഷൻ... നേട്ടങ്ങളുടെ പട്ടിക ടൈം 100 നെക്സ്റ്റ് പട്ടിക യിലെത്തി നിൽക്കുന്നു.

പുതിയ നേട്ടമറിഞ്ഞ് അഭിമുഖത്തിനായി വിളിച്ചപ്പോൾ തമിഴ്നാട്ടിലെ ഒരു കുഗ്രാമത്തിൽ മേസ്തിരിമാർക്കൊപ്പം മണ്ണ് കുഴയ്ക്കുന്ന തിരക്കിലായിരുന്നു വിനു.

"രണ്ടു ദിവസം കഴിഞ്ഞാൽ ഹോങ്കോങ്ങിലേക്ക് യാത്ര തിരിക്കും. സർവകലാശാലയിലെ എംആർക് വിദ്യാർഥികൾക്ക് ക്ലാസ് എടുക്കാൻ. അവിടെ നിന്ന് തിരിച്ചെത്തുന്നത് മഹാരാഷ്ട്രയിലെ കാർജാത് ഗ്രാമത്തിലേക്ക്. ദർഭപ്പുല്ലു കൊണ്ട് കെട്ടിടവും പാലവുമൊക്കെ നിർമിക്കുന്ന ആബേ മൂപ്പനിൽ നിന്ന് കുറച്ചു വിവരങ്ങൾ ശേഖരിക്കാനുണ്ട്. അതുകഴിഞ്ഞാൽ നേരെ കൊച്ചിയിലേക്കെത്താം. ഇതാണ് വിനു ദാനിയേൽ വേറിട്ട വഴികളാണ് എപ്പോഴും പഥ്യം. അവയൊരിക്കലും പ്രവചനത്തിനു പിടിതരാറുമില്ല.

തന്റെ ആശയങ്ങൾ, പ്രതീക്ഷകൾ, ആശങ്ക കൾ ഇവയൊക്കെ വിനു ദാനിയേൽ വനിത വീ ടുമായി പങ്കുവയ്ക്കുന്നു.