திரில்லர் கதைதான் சினிமாவுக்கான சீக்ரெட் ஃபார்முலா!

எந்தக் கதையானாலும் திரில்லர் அடிப்படையில் சுவாரசியமா கதை சொன்னால் ஆடியன்சை ஈசியாக கதைக்குள் கொண்டு வரமுடியும். ..' இது இயக்குநர் அறிவழகன் சாருடைய அட்வைஸ். அதைத்தான் நான் பின்பற்றுகிறேன்...” குருவின் வார்த்தைகளை கடைப்பிடிக்கும் சிஷ்யனாக பேசுகிறார் அறிமுக இயக்குநர் கௌதமன் கணபதி.

- ஷாலினி நியூட்டன்

திரில்லர் போலீஸ் கதையாக ‘சரண்டர்' திரைப்படம் கொடுக்கவிருக்கிறார்.

“அறிவழகன் சார்கிட்ட அசிஸ்டெண்ட் டாக வேலை செய்திருக்கேன். 'பார்டர்', 'தமிழ் ராக்கர்ஸ்' தொடர்ந்து ‘சப் தம்' ப்ரீ - ப்ரொடக்ஷன் வரை அவருடன்தான் பயணம்.

பத்து வருடங்களுக்குப் பிறகு என்னுடைய முதல் படம் ‘சரண்டர்'. சொந்த ஊர் திருச்சி. சாப்ட்வேர் இன்ஜினியர். வெளிநாட்ல ஐடி துறையில் வேலை செய்துட்டு இருந்தேன். ஆனா, சினிமா ஆசை என்னை விடலை.

அதனால் நான் வேலையை விட்டுட்டேன். அப்பா, அம்மாவுக்கு வருத்தம்தான். ஆனா, அதைத் தாண்டி என்மேல் ஒரு நம்பிக்கை இருந்தது... இருக்கு...” தன்னைக் குறித்து பேசியவர் தொடர்ந்து படம் குறித்து பேசத் துவங்கினார்.

“ஒருசில வார்த்தைகள் தலைப்பாக தேர்வு செய்துட்டாலே அது காவல்துறை சார்ந்த படம்னு தானாகவே அடையாளம் கிடைச்சிடும். 'என் கடமை' முதல் 'விசாரணை' வரை இந்த மாதிரி தலைப்புகள் ஏராளம்.

அதை அடிப்படையா யோசிச்சுதான் 'சரண்டர்' பெயரை தலைப்பாக்கினோம். கூடிய சீக்கிரம் ரிட்டையர் ஆகப் போகிற சீனியர் காவல் அதிகாரியா லால் சார். அவருக்கு ஜூனியராக தர்ஷன்.