തുടിമൊഴികൾ നിലച്ചു

ഈയിടെ അന്തരിച്ച കെ.ജെ.ബേബിയ്ക്ക് പ്രണാമം. വയനാട്ടിലെ ആദിമനിവാസികളെക്കുറിച്ച് നിരന്തരമായി പഠിക്കുകയും അവരുടെ പുരാവൃത്തങ്ങളും പാട്ടുകളും തുടിയും താളവും ഹൃദിസ്ഥമാക്കുകയും ചെയ്ത എഴുത്തുകാരനായിരുന്നു; കെ.ജെ.ബേബി.

- കെ.കെ.സനിൽ

ഒരുകാലത്ത് വയനാട്ടിലെ ഇരുൾ മൂടിയ ഗ്രാമങ്ങളെയെല്ലാം ഉണർത്തി, പാട്ടും തീപ്പന്തവുമായി വേദികൾ തോറും നിഴലും വെളിച്ചവുമായി, അടിമ ജീവിതത്തിന്റെ പൊള്ളുന്ന കഥകൾ പറഞ്ഞു പോയ ഒരു നാടകമുണ്ടായിരുന്നു; നാടു ഗദ്ദിക. രോഗങ്ങളും പീഡകളും മറ്റശുഭങ്ങളും വിതച്ച് ശരീരത്തെയും കുടിപാർപ്പിനെയും കീഴടക്കുന്ന ദുർദ്ദേവതയെ ഉച്ചാടനം ചെയ്യു ന്നതിനു അടിയോരു നടത്തുന്ന മന്ത്രവാദ ചടങ്ങാണ് ഗദ്ദിക. രോഗം ബാധിച്ച നാടിന്റെ മോചനത്തിനായി ഉറഞ്ഞാടിയ നാടകത്തിനു നാടുഗദ്ദിക എന്നല്ലാതെ മറ്റെന്തു പേരാണു നല്കുക. നാടകകൃത്ത് കെ.ജെ.ബേബിയും വേറൊരാളുമൊഴികെ മറ്റെല്ലാവരും ആദിവാസി വിഭാഗത്തിൽ നിന്നുള്ളവരായിരുന്നു. അക്ഷരമെന്തെന്നറിയാത്ത, തമ്പുരാൻ പാടം മാത്രമാണ് ലോകമെന്നറിയുന്ന അടിസ്ഥാന വർഗ്ഗം വേദിയിൽ നിറഞ്ഞാടിയത്, അവിസ്മരണീയാനുഭവമാണ്. നാടു ഗദ്ദികയ്ക്കു മുമ്പ് വയനാടിനു പുറത്ത് ആദിവാസി അറിയപ്പെട്ടത്, വെറും അടിമകളായിട്ടാണ്. അപരിഷ്കൃതരായിട്ടാണ്. മന്ത്രവാദങ്ങളും ഒടിയൻ വിദ്യകളുമറിയുന്ന അപകടകാരികളായിട്ടാണ്. എന്തുകൊടുത്താലും നന്നാവാത്ത ബുദ്ധിശൂന്യരായിട്ടാണ്.

വയനാട്ടിലെ ആദിവാസിക്ക് മനുഷ്യനായി അംഗീകാരം ലഭിച്ചത്,നാടുഗദ്ദികയുടെ വേദി കളിലൂടെയാണ്. നാടകം കാണാൻ ഒത്തുകൂ ടിയത്, ആദിവാസികൾ മാത്രമായിരുന്നില്ല. മണ്ണിൽ വിയർപ്പു കൊണ്ടു ജീവിതത്തിന്റെ കഥയെഴുതുന്ന കുടിയേറ്റത്തൊഴിലാളികൾ കൂടിയാണ്. മണ്ണിൽ പണിയെടുക്കുന്ന തൊഴിലാളിയെന്ന വർഗ്ഗബോധത്തിന്റെ നിറനിലാവ് കാണാതെ പോകരുത്.വയനാടിന്റെ മലനി രകളിൽ നിന്ന്, കരിന്തണ്ടന്റെ ചുരമിറങ്ങി നാടകം സഞ്ചരിക്കാനിടയായതും വെറും യാദൃശ്ചികതയല്ല. തമ്പുരാൻ പാടത്ത് ഈ പണിയാളുകൾ കൂലി, ചോദിച്ചു വാങ്ങുമോയെന്നു മേലാളപ്രഭുക്കൾ ഭയപ്പെടാതിരുന്നില്ല. അവരുടെ ഭരണകൂടങ്ങൾ നാടകത്തിനു പിന്നാലെ പോലീസിനെയും വിട്ടു. ഇതുവരെ കണ്ടതിൽ വച്ച് ഏറ്റവും മനോഹരമായ നാടകമാണിതെന്ന്, അതിലൊരുദ്യോഗസ്ഥൻ പറഞ്ഞത് വെറുതെ ഓർമിക്കാം. തെരുവു നാടകങ്ങൾ പിറവിക്കൊള്ളുന്നതിനു മുമ്പ് വയനാട്ടിലെ ഗ്രാമ ഹൃദയങ്ങളെ വേദിയാക്കിയ നാടകമാണ്, നാടുഗദ്ദിക.

വയനാട്ടിലെ ആദിമനിവാസികളെക്കുറി ച്ച് നിരന്തരമായി പഠിക്കുകയും അവരുടെ പുരാവൃത്തങ്ങളും പാട്ടുകളും തുടിയും താളവും ഹൃദിസ്ഥമാക്കുകയും ചെയ്ത എഴുത്തുകാരനായിരുന്നു; കെ.ജെ.ബേബി. നാടുഗദ്ദിക അവതരിപ്പിക്കുന്ന വേദികളിൽ, ബേബിയേട്ടൻ തന്നെ പാടുന്ന ഒരു അവതരണ ഗാനമുണ്ട്; ഉദ്ധാരകോ, നിയേ ശരണം.