സി.എൻ.വി. ആക്ട് ലംഘിക്കാൻ വെറുതെ ഒരു 'കരാർ നിയമം

കരാർ നിയമനത്തിൽ പാലിക്കേണ്ട സി.എൻ.വി. ആക്ടിലെ വ്യവസ്ഥകൾ ദുർബലം, ഈ നിയമം ലംഘിക്കാൻ എളുപ്പം

ആൻസൻ വത്സലൻ

എംപ്ലോയ്മെൻറ് എക്സ്ചേഞ്ചിൻറ സീനിയോറിറ്റി ലിസ്റ്റിൽ വർഷങ്ങളായി രജിസ്റ്റർ ചെയ്ത് ജോലിക്കായി കാത്തിരിക്കുന്നവർ അനവധിയാണ്. ഇവരെയെല്ലാം തഴഞ്ഞ് തോന്നിയപടി ആളുകളെ നിയമിക്കാൻ സർക്കാരുകൾക്ക് എങ്ങനെ സാധിക്കുന്നു? എംപ്ലോയ്മെൻറ് എക്സ്ചേഞ്ചിന് നിയമപിന്തുണയുണ്ടായിട്ടും നിയമവിരുദ്ധമായി നിയമിക്കപ്പെടുന്നവരുടെ എണ്ണം കൂടുകയാണ്.

വാസ്തവത്തിൽ എന്താണ് എംപ്ലോയ്മെൻറ് എക്സ്ചേഞ്ചിൻ നിയമസാധുത ? സർക്കാർ സ്ഥാപനങ്ങളിലെ പ്രോജക്ടുകളിലെ നിയമനങ്ങൾ നടത്തേണ്ടത് ഇങ്ങനെയോ? ഈ വിഷയത്തിൽ ചോദ്യങ്ങൾ നിരവധിയാണ്.

പബ്ലിക് സർവീസ് കമ്മിഷൻ പരിധിക്ക് പുറത്തുവരുന്ന ഒഴിവുകളെല്ലാം സി.എൻ.വി. നിയമ പ്രകാരം എംപ്ലോയ്മെൻറ് എക്സ്ചേഞ്ച് വഴി നികത്തണം. എന്നാൽ നിയമം നടപ്പിലാക്കേണ്ട സർക്കാർ ഉദ്യോഗസ്ഥർതന്നെയാണ് എംപ്ലോയ്മെൻറ് എക്സ്ചേഞ്ചുകളെ അറിയിക്കാതെ നിയമനം നടത്തുന്നത്. ഇത്തരം നിയമനങ്ങൾ നടത്തുന്നവർക്കെതിരേ നിയമനടപടി സ്വീകരിക്കാനുള്ള വകുപ്പുണ്ട്, പക്ഷേ ദുർബലമെന്നുമാത്രം.

സി.എൻ.വി. ആക്ട് '

കംപൽസറി നോട്ടിഫിക്കേഷൻ ഓഫ് വേക്കൻസീസ് ആക്ട് എന്നതാണ് സി.എൻ.വിയുടെ പൂർണരൂപം. 1959-ലെ ഈ നിയമപ്രകാരം, ഇരുപത്തിയഞ്ചോ അതിൽ കൂടുതലോ ആളുകൾ ജോലിചെയ്യുന്ന സ്വകാര്യ മേഖലകളിലെ സ്ഥാപനങ്ങൾ, ഒഴിവുകൾ എംപ്ലോയ്മെൻറ് എക്സ്ചേഞ്ചിൽ വിജ്ഞാപനം ചെയ്യേണ്ടതുണ്ട്.