ഹാപ്പിയാക്കാം അമ്മ മനസ്സ്

അമ്മയെ സന്തോഷിപ്പിക്കാൻ ഒരു ഉമ്മയോ കെട്ടിപ്പിടുത്തമോ 'ലവ് യൂ അമ്മാ' എന്ന കൊഞ്ചലോ വേണം. ഓരോ പ്രായത്തിലും മക്കൾക്കു ചെയ്യാവുന്ന 25 കാര്യങ്ങൾ...

- രൂപാ ദയാബ്ജി

അമ്മയ്ക്കു മക്കളോടുള്ള സ്നേഹം അളക്കാനാകില്ലല്ലോ. വയറ്റിനുള്ളിൽ ഒരു കുഞ്ഞു സ്പന്ദനമായി പിറവിയെടുക്കുന്ന നിമിഷം മുതൽ ഫെൽ ഇൻ ലവ് വിത് യൂ' എന്ന ടാഗ് അമ്മ സ്വയം എടുത്തണിയും. പക്ഷേ, അമ്മയോടു നിങ്ങൾക്ക് എത്ര സ്നേഹമുണ്ട് ? അമ്മയുടെ ജന്മദിനം എല്ലാ വർഷവും ആഘോഷിക്കാറുണ്ടോ? കുറേ കാലമായി അമ്മ പോകണമെന്ന് ആഗ്രഹം പറയുന്ന ഒരിടം ഇപ്പോഴും വെയ്റ്റിങ് ലിസ്റ്റിൽ ആണോ?

അമ്മയെ സന്തോഷിപ്പിക്കാൻ ഓരോ പ്രായത്തിലും മക്കൾക്കു ചെയ്യാൻ ഒരുപാടു കാര്യങ്ങളുണ്ട്. ഒരു കെട്ടിപ്പിടിത്തവും ഉമ്മയും മുതൽ വലിയൊരു ആഗ്രഹം നിറവേറ്റുന്നതു വരെ ആ ലിസ്റ്റിൽ പെടും. പ ക്ഷേ, ഇതൊന്നും ആരും പറഞ്ഞിട്ടു ചെയ്യേണ്ടതല്ല കേട്ടോ.

അമ്മയെ സന്തുഷ്ടരാക്കാൻ ചെയ്യാവുന്ന 25 കാര്യങ്ങൾ ഇതാ. വരുന്ന മാതൃദിനത്തിൽ അമ്മയ്ക്ക് സർപ്രൈസ് സമ്മാനമായി ഈ ശീലങ്ങൾ തുടങ്ങിയാലോ. തീരെ ചെറിയ കുട്ടികളെ ഈ കാര്യങ്ങൾ പരിചയപ്പെടുത്താൻ അച്ഛനോ മുത്തശ്ശനോ മുത്തശ്ശിയോ വീട്ടിലുള്ള മുതിർന്നവരോ ഒക്കെ മുൻകൈ എടുത്താൽ അമ്മയ്ക്ക് ഇരട്ടി സന്തോഷമാകുമെന്ന് ഉറപ്പ്.

അഞ്ചു വയസ്സു വരെ

ചെറിയ കുട്ടികൾ രാവിലെ ഉണർന്നെഴുന്നേറ്റ ഉടനേ അമ്മയോടു ഗുഡ് മോർണിംഗ് പറയുക. അമ്മയുടെ മനസ്സ് സദാ കുട്ടികൾക്കു ചുറ്റുമാണ്. ജീവിതത്തിൽ അമ്മ ഏറ്റവും സന്തോഷിക്കുന്നതു മക്കൾ പോസിറ്റീവായി സംസാരിക്കുമ്പോഴാണ്. കുട്ടി രാവിലെ തന്നെ പ്രഭാതവന്ദനം നടത്തുന്നത് അമ്മയ്ക്ക് ആ ദിവസം മുഴുവൻ നന്നായി പ്രവർത്തിക്കാനുള്ള ഊർജം പകരും. നല്ലൊരു വ്യക്തിയായി വളരാനുള്ള ആദ്യപാഠമാണ് അമ്മയോടു പ്രകടിപ്പിക്കുന്ന സ്നേഹവും ബഹുമാനവും.

ഞാൻ അമ്മയ്ക്കു വേണ്ടി എന്നും പ്രാർഥിക്കാറുണ്ട് എന്ന് അമ്മയോടു പറയാം. അമ്മയുടെ നന്മയ്ക്കു വേണ്ടി മക്കൾ പ്രാർഥിക്കുന്നതും അത് അനുഭവിക്കുന്നതും അമ്മയ്ക്ക് ആത്മവിശ്വാസവും സന്തോഷവും നൽകും. പ്രകടിപ്പിക്കപ്പെടുന്ന സ്നേഹമാണ് കരുതൽ. മക്കളുടെ മനസ്സിൽ തന്നെക്കുറിച്ചുള്ള കരുതൽ ഉണ്ടെന്ന തിരിച്ചറിവ് അമ്മയുടെ മാനസികാരോഗ്യം മെച്ചപ്പെടുത്തും. മനസ്സിന്റെ സന്തോഷം രോഗപ്രതിരോധശേഷിയെ വരെ ഗുണപരമായി സ്വാധീനിക്കും.