ഹാപ്പിയാകാൻ HOBBY

ജോലിക്കും വീടിനും ഇടയിലൂടെ ജീവിതം ഇങ്ങനെ പാഞ്ഞു പോകുമ്പോൾ ബോറടിക്കാതിരിക്കാൻ മനസ്സിന് ഏറെ ഇഷ്ടമുള്ള ഒരു ഹോബി തുടങ്ങാം

- ഡോ.അരുൺ ബി നായർ പ്രഫസർ,സൈക്യാട്രി വിഭാഗം മെഡിക്കൽ കോളജ് തിരുവനന്തപുരം

ഹാപ്പി ന്യൂ ഇയർ. ഈ വർഷം ഹാപ്പിയായിരിക്കാൻ ചെയ്യേണ്ട മിനുക്കു പണികളുടെ ലിസ്റ്റ് കൈയിൽ ഇല്ലേ? ഇന്നു മുതൽ വ്യായാമം ചെയ്യും, ഈ വർഷം വിദേശയാത്രയ്ക്കു പോകും, അല്ലെങ്കിൽ ഡയറ്റ് കൃത്യമാക്കും. ഇതൊക്കെ നിങ്ങളുടെ ബക്കറ്റ് ലിസ്റ്റിൽ ഉണ്ടായിരിക്കാം. എന്നാൽ അതിനൊപ്പം ഹോബിയും കൂടി ചേർക്കാവുന്നതാണ്. അതും നിങ്ങളുടെ സന്തോഷത്തിലേക്കുള്ള താക്കോലാണ്.

90കിഡ്സിന് വരെ നൊസ്റ്റാൾജിയയുടെ പെട്ടിയിൽ പല തരം ഹോബികൾ പൊടിപിടിച്ചിരിക്കുന്നുണ്ടാകും. സ്റ്റാംപ് കലക്ഷനും നാണയ ശേഖരവും മുതൽ ചൂയിംഗത്തിനൊപ്പമുള്ള ക്രിക്കറ്റ് താരങ്ങളുടെ പടമുള്ള റാപ്പറുകൾ വരെ അന്ന് അതിൽ നിന്നു കിട്ടുന്ന സന്തോഷം വലുതായിരുന്നു.

അതൊക്കെ ഒരു കാലം. ഇന്നിപ്പോ ആ സന്തോഷം എങ്ങനെ കിട്ടാനാണ് എന്നാണോ? ഹാപ്പിനെസിന് പ്രായമില്ല ബ്രോ. ശരിക്കും നമ്മുടെ മനസ്സുണ്ടല്ലോ, ചാടിത്തുള്ളാൻ റെഡിയായിരിക്കുകയാണ്. നമ്മൾ അതിനുള്ള സാഹചര്യം ഒരുക്കി കൊടുത്താൽ മതി. ഇങ്ങനെ പാഞ്ഞു പാഞ്ഞു കിതച്ചിരിക്കുമ്പോൾ നമുക്കും വേണ്ടേ നമ്മുടേതായ സമയം. ആ സമയത്തു ചെയ്യാൻ ഏറ്റവും നല്ല പരിപാടിയാണ് ഹോബി. നിങ്ങളുടെ ഏറ്റവും പ്രിയപ്പെട്ട ചങ്ങാതിയെ പോലെ ഒരുപാട് ഇഷ്ടമുള്ള ഒരു ഹോബി.

ഇതൊക്കെ നടക്കുമോ എന്നാണോ? അതിനൊക്കെ എവിടെ സമയം എന്നാണോ? എനിക്കിഷ്ടപ്പെട്ട ഹോബി എങ്ങനെ കണ്ടെത്തും എന്നാണോ? ഡോ.അരുൺ ബി. നായർ നിർദേശിക്കുന്ന ഈ മാർഗങ്ങൾ പരീക്ഷിച്ചു നോക്കൂ.

അപ്പോൾ തുടങ്ങാം

കുട്ടിക്കാലത്തു കൗതുകത്തോടെ ചെയ്തിരുന്ന പല ഹോബികളും ഇടയ്ക്ക് വച്ചു നിന്നു പോയിട്ടുണ്ടാകും. പഠനത്തിന്റെയും ജോലിയുടെയും തിരക്കാകാം. എന്നെങ്കിലും ജീവിതമൊന്ന് സെറ്റിലായി കഴിഞ്ഞു മറ്റൊരു ഹോബി കൂടെക്കൂട്ടാമെന്നു കരുതിയതാകാം. അതുമല്ലെങ്കിൽ അങ്ങനെയൊരു ഹോബി തന്ന സന്തോഷം മറ ന്നു പോയതുകൊണ്ടുമാകാം. പാട്ടു പാടുന്നതോ എഴുതുന്നതോ നൃത്തമോ കൃഷിയോ ഗാർഡനിങ്ങോ തയ്യലോ കേക്ക് മേക്കിങ്ങോ തുടങ്ങി എന്തുമാകട്ടെ... ജനുവരി മുതൽ ചെയ്തു തുടങ്ങാം.