ഇനി വരുന്നത് കാൻസർ ഇല്ലാത്ത കാലം

വേദനയും കാൻസറും ഇല്ലാത്ത ഒരു ലോകം അധികം അകലെയല്ല. കാൻസർ ചികിത്സാരംഗത്തെ പുതിയ മുന്നേറ്റങ്ങൾ എന്തൊക്കെയാണ്?

- ഡോ.ജെയിം അബ്രാഹം ചെയർമാൻ & പ്രഫസർ ഓഫ് മെഡിസിൻ, ഹെമറ്റോളജി & മെഡിക്കൽ ഓങ്കോളജി വിഭാഗം, ക്ലീൻഡ് ക്ലിനിക്, യുഎസ്എ

ക്രിസ്മസും പുതുവത്സരവും ആഘോഷിക്കാൻ വന്നവരെല്ലാം നാടുകളിലേക്കു മടങ്ങി. അവധിക്കാലം ഉത്സാഹഭരിതമാക്കിയ ശേഷം പ്രിയപ്പെട്ടവർ പോയതിനേക്കാൾ പ്രയാസം നെഞ്ചിൽ തോന്നിയതു കൊണ്ടാണു നീന മാറിടമൊന്നു പരിശോധിച്ചത്. ചെറിയൊരു മുഴ കണ്ടതോടെ അവൾക്ക് ആധിയായി. ദിവസങ്ങൾ കഴിയുന്തോറും ആധിയോടൊപ്പം മുഴയും വലുതായി. ആർത്തവചക്രത്തിലെ മാറ്റമാകാം കാരണമെന്നാണ് ആദ്യം കരുതിയത്. മാറിടത്തിലെ ചർമത്തിന്റെ ചുവപ്പു ശ്രദ്ധയിൽപെട്ടതോടെ പരിഭ്രമം കലശലായി.

37 വയസ്സു കഴിഞ്ഞതേയുള്ളൂ നീനയ്ക്ക് കൊച്ചി ആ സ്ഥാനമായുള്ള ഇന്റർനാഷനൽ സ്റ്റാർട്ടപ്പിൽ പ്രമോഷൻ കിട്ടി ജീവിതം ലക്ഷ്യബോധമുള്ളതാകാൻ തുടങ്ങിയ സമയം. മൂത്ത മകൾ നാലാം ക്ലാസ്സിലാണ്. ഇളയവൾ കിന്റർഗാർട്ടനിൽ പോകാനുള്ള ഒരുക്കത്തിലും വിവാഹ മോചിതയും കുടുംബത്തിന്റെ ഉത്തരവാദിത്തം ചുമലിലേറ്റുന്നവളുമായ നീനയ്ക്ക് അസുഖം വരുന്നതു സങ്കൽപിക്കാനേ കഴിയുമായിരുന്നില്ല. വലിയ പ്രശ്നമൊന്നും ആവില്ല' എന്നവൾ സ്വയം സമാധാനിച്ചു. അമ്മയോടു പോലും ഇക്കാര്യം പറഞ്ഞില്ല. എന്തിനു വെറുതെ അമ്മയെക്കൂടി വിഷമിപ്പിക്കണം.

രണ്ടു മാസം കഴിഞ്ഞു നീന ഡോക്ടറെ കാണാനെത്തിയപ്പോഴേക്കും സ്തനത്തിലെ മുഴ ഏകദേശം 6-8 സെന്റിമീറ്ററായി വളർന്നിരുന്നു. അവളുടെ കയ്യിൽ ലിംഫ് നോഡുൾ സ്പഷ്ടമായി. മാറിടത്തിലെ ചർമം മുഴുവൻ ചുവന്നു വീർത്തു.

നീനയ്ക്ക് അഗ്രസീവ് സ്റ്റേജ് മൂന്ന് സ്തനാർബുദമാണെന്നു കണ്ടെത്തി, കീമോതെറപി ആരംഭിച്ചു. അവളുടെ അച്ഛന്റെ ബന്ധത്തിലുള്ള രണ്ട് അമ്മായിമാർ അണ്ഡാശയ കാൻസർ വന്നു മരിച്ചു പോയിട്ടുണ്ട്. അച്ഛന് അറുപതാം വയസ്സിൽ പ്രോസ്റ്റേറ്റ് കാൻസർ കണ്ടെത്തുകയും ചെയ്തിരുന്നു. സ്തനാർബുദത്തിന്റെ തരവും ശക്തമായ കുടുംബചരിത്രവും തിരിച്ചറിഞ്ഞതോടെ നീനയെ സ്തന - അണ്ഡാശയ അർബുദത്തിന് ഉയർന്ന അപകടസാധ്യത ഉണ്ടാക്കുന്ന ജീനുകൾ വിലയിരുത്താനുള്ള ടെസ്റ്റുകൾക്കു വിധേയയാക്കി. BRCA 1 ജീനിന്റെ ടെസ്റ്റ് റിസൽറ്റും പോസിറ്റീവായി.

പ്രായമായവരിൽ മാത്രമല്ല, നീനയെപ്പോലുള്ള ചെറുപ്പക്കാരിലും കാൻസർ പെരുകുകയാണ്. ഇന്ത്യയിൽ അടുത്ത വർഷത്തോടെ കാൻസർ രോഗികളുടെ എണ്ണം 16 ലക്ഷമാകുമെന്നാണു കണക്ക്. കേരളത്തിൽ ഓരോ വർഷവും 35000 ഓളം പേർക്ക് അർബുദ ബാധയുണ്ടാകുന്നു.