ജോലി കിട്ടിയ ഉടനെ കാർ ലോൺ എടുത്താൽ?

സമ്പത്തു കാലത്തു നടുന്ന തൈകളാണു നിക്ഷേപങ്ങൾ. വരുമാനം എങ്ങനെ സുരക്ഷിതമായ നിക്ഷേപമാക്കാം എന്നു ചിന്തിക്കുന്നവർക്ക് മാർഗനിർദേശങ്ങൾ നൽകുന്ന പംക്തി...

- നിഖിൽ ഗോപാലകൃഷ്ണൻ സിഇഒ, പെന്റാഡ് സെക്യൂരിറ്റീസ്

ജോലിയിൽ പ്രവേശിച്ച് ഏതാനും മാസങ്ങൾക്കുള്ളിൽത്തന്നെ റോഷൻ ഏറെ നാളത്തെ സ്വപ്നമായ ആഡംബര കാർ ബുക്ക് ചെയ്തു. ഡൗൺ പേയ്മെന്റായി ചെറിയൊരു തുക നൽകിയശേഷം ബാക്കി ലോണിന് അപേക്ഷിച്ചു. ശമ്പളത്തിൽ നിന്ന് ഇഎംഐ അടഞ്ഞു പോകുമെന്നതായിരുന്നു റോഷന്റെ പ്രതീക്ഷ.

ഒരു വർഷം കാര്യങ്ങൾ നല്ല രീതിയിൽ മുന്നോട്ടു പോയെങ്കിലും അപ്രതീക്ഷിതമായി ജോലി നഷ്ടമായതോടെ റോഷന്റെ കണക്കുകൂട്ടലുകളെല്ലാം തെറ്റി. മറ്റൊരു ജോലി കണ്ടെത്തുന്നതുവരെ പിടിച്ചു നിൽക്കാൻ ബുദ്ധി മുട്ടുമെന്ന് അയാൾക്കു മനസ്സിലായി. ആഗ്രഹിച്ചു സ്വന്തമാക്കിയ കാർ അധികം വൈകാതെ റോഷന് തലവേദനയായി മാറി. കൃത്യമായ സാമ്പത്തിക ആസൂത്രണം ഇല്ലാതെ പോയതാണ് റോഷന്റെ ജീവിതത്തിൽ വില്ലനായത്.

വാഹനങ്ങൾ സ്വന്തമാക്കുകയെന്നത് വ്യക്തിപരമായ നേട്ടം തന്നെയാണ്. ആഗ്രഹത്തിനപ്പുറം കൂട്ടുകാരനേക്കാളോ അയൽപക്കക്കാരനേക്കാളോ മികച്ച വാഹനം എനിക്കും വേണമെന്ന ദുർവാശിയും പലപ്പോഴും പ്രതിനായകനാകാറുണ്ട്. വാഹനങ്ങൾ ഒരിക്കലും നിക്ഷേപമല്ല എന്നു മനസ്സിലാക്കുക. കാരണം ദിവസങ്ങൾ മുന്നോട്ടു പോകുമ്പോൾ വാഹനത്തിന്റെ വില താഴേക്കു പോകും.