સમજી લો, આ સાત હકીકત...

ઈન્વેસ્ટમેન્ટના બધા માર્ગ ભારત તરફ ફંટાઈ રહ્યા છે. ભારતીય અર્થતંત્રના ઊંચા વિકાસદર અને માર્કેટના ઊંચા ઈન્ડેક્સ લેવલનો આધાર માત્ર રાજકીય પરિબળો નથી, આર્થિક સુધારા અને મજબૂત ફંડામેન્ટલ્સનો આમાં મોટો ફાળો છે.

- જયેશ ચિતલિયા

આગામી વરસે કે ત્રણ વરસમાં શૅરબજારના બેન્ચમાર્ક ઈન્ડેક્સ કયા ઊંચા વિક્રમી લેવલે હશે અને ભારતીય અર્થતંત્રનું કદ વિશ્વમાં ત્રીજા ક્રમે હશે એ પ્રકારની આગાહી કે ધારણા મજબૂત બનતી જાય છે. માર્કેટની નવી ઊંચાઈની વાત હોય ત્યારે સેન્સેક્સ અને નિફ્ટી કયા લેવલે પહોંચશે એમ બોલાય છે એનો સીધો અને સ્પષ્ટ અર્થ શું થાય? જવાબ સમજો તો એક ઈશારો પૂરતો છે.

સેન્સેક્સ વધવાનો અર્થ એ કે સેન્સેક્સમાં જેનો સમાવેશ છે એ ૩૦ સ્ટૉક્સના ભાવ ઊંચા જશે તો નિફ્ટી ઉપર જવાનો અર્થ નિફ્ટીમાં રહેલા પચાસ સ્ટૉક્સના ભાવ એ મુજબ વધશે. અલબત્ત, અત્યારે તો સમગ્ર માર્કેટ વધવાની દિશામાં છે. ભારતીય સ્ટૉક માર્કેટ તેજીનાં નવાં રંગ-રૂપ ધારણ કરીને આગળ વધી રહ્યું છે ત્યારે કેટલીક હકીકત સમજી લેવામાં સાર છે. આ હકીકત આર્થિક ફંડામેન્ટલ્સની હોવાથી તેજીના પાયા પણ મજબૂત હોવાના પુરાવા સમાન છે.

પહેલી હકીકત, દેશના અર્થતંત્રનાં ફંડામેન્ટલ્સ મજબૂત બનતાં જાય છે.  અત્યારે ઈમર્જિંગ માર્કેટ્સમાં ભારત સૌથી ઊંચી કૅટેગરીમાં છે. વિદેશી સંસ્થાકીય ઈન્વેસ્ટર્સ અને વિદેશી પોર્ટફોલિયો ઈન્વેસ્ટર્સ (એફઆઈઆઈ અને એફપીઆઈ) ઉપરાંત વિવિધ દેશોનાં પેન્શન ફંડ પણ રોકાણ માટે ભારત તરફ વળી રહ્યાં છે.