બેગુનાહ રંગ

ગુલાબી રંગનો ડ્રેસ પહેરી ડાન્સ કેમ ન થાય?

- રાજુ પટેલ

આપણે પોલીસ પ્રોટેક્શનની વ્યવસ્થા કરીશું. એમ કોઈની દાદાગીરી થોડી સહી લેવાની હોય?’ પરિણીતીએ કહ્યું.

‘પોલીસ કેટલા દિવસ પ્રોટેક્શન આપશે? આ તો સોસાયટીના વાતાવરણમાં ડર ફેલાવવાની વાત છે.’

‘તો? શું કરવું જોઈએ?’

કોઈક રીતે સમશેર ખાન અને ચટ્ટાનસિંહને આ હિંસક વિરોધ ન કરવા સમજાવવા જોઈએ.’

‘પણ એ લોકો સમજશે?’ પરિણીતીએ પૂછ્યું.

‘આપણે શાંતિમંત્રણાનો પ્રયાસ કરીએ. હિંસાનો વિરોધ હિંસાથી ન થઈ શકે.’

મોતીવાલા અને પરિણીતી મારી સામે નવાઈ પામી જોઈ રહ્યાં. દેખીતું હતું કે એમને મારી વાતમાં સહેજે ભરોસો નહોતો.

મેં કહ્યું: ‘મારી પાસે એક સરસ વિડિયો છે. કદાચ એ લોકોને પોતાની ભૂલ સમજાઈ પણ જાય.’

મેં ફોન પર દીપિકા પદુકોણની કોઈ કલર કંપનીની જાહેરાત બતાવી. એમાં દીપિકા જુદા જુદા ડેસમાં જાહેરખબર માટે ફોટા પડાવે છે, પછી એ દીપિકાને અમુક ફોટા ખૂબ ગમે છે, પણ ફોટોગ્રાફરને એ ફોટા નથી ગમતા. એ બીજા જ ફોટાનાં વખાણ કરે છે. દીપિકા એ ફોટા જોઈ ફોટોગ્રાફરને પૂછે છેઃ ‘તને આ ફોટા ગમ્યા? પણ આ ફોટાઓમાં હું તો સાવ ખૂણામાં છું. અમુકમાં તો મારો ચહેરો પણ કપાઈ ગયો છે!’

ફોટોગ્રાફર જવાબ આપે છે: ‘હા, પણ દીવાલનો રંગ કેટલો સરસ રીતે ઊપસી આવ્યો છે આ ફોટાઓમાં? જાહેરાત તો રંગની છે, તું તો છે જ સુંદર. તારી સુંદરતા માટે કંઈ આ ફોટો સેશન નથી કરી રહ્યાં!'

મોતીવાલા અને પરિણીતીના ચહેરા પર નિરાશા હતી. મોતીવાલા તો બબડ્યા પણ ખરાઃ ‘આવી ડાહી ડાહી વાતોથી શું થાય?’ 

આ મામલો ભારત દર્શન નામની એક સોસાયટીનો હતો. એ સોસાયટીમાં વિવિધ ધર્મ, જાતિના દોઢસો જેટલા લોકો રહેતા હતા. એમનો વાર્ષિક કાર્યક્રમ આવી રહ્યો હતો, જેમાં એક રમાકાંતભાઈની દીકરી નીકિતા લોકનૃત્ય કરવાની હતી. સોસાયટીના આ વાર્ષિક કાર્યક્રમમાં નીકિતા ગુલાબી રંગનો ડ્રેસ પહેરવાની છે એવું કારણ આગળ ધરી સોસાયટીના કેટલાક લોકોએ વિરોધ કરવા માંડ્યો. આ વિરોધ સમજાય નહીં એવો હતોઃ ગુલાબી રંગનો ડ્રેસ પહેરી ડાન્સ ન થાય?