കണ്ണിനാനന്ദം കോയ് പോണ്ട്

പൂന്തോട്ട സൗന്ദര്യവും അലങ്കാരമത്സ്യങ്ങളും ഒരുമിച്ച് ചേരുന്ന കോയ് പോണ്ട് പുതിയ തരംഗമാണ്

- വിവരങ്ങൾക്കു കടപ്പാട്: ആർ. കിഷോർ, കൃതി ആർട്സ്, തിരുവനന്തപുരം

ചെറിയ പ്ലോട്ട് ആണെങ്കിലും കുറച്ച് ചെടികളും മരങ്ങളും കിളികളുമെല്ലാം ഉൾപ്പെടുന്ന ഇക്കോസിസ്റ്റമാകണം വീട് എന്നാണ് പുതിയ ചിന്ത, അതുകൊണ്ടുതന്നെ അലങ്കാരമത്സ്യക്കുളത്തിന് വീടിനകത്തും പുറത്തും പ്രത്യേക സ്ഥാനമുണ്ട്. കോയ്കാർപ് മത്സ്യങ്ങൾ തുള്ളിക്കളിക്കുന്ന കോയ് പോണ്ടുകൾ (Koi pond) പുതിയ കാലഘട്ടത്തിലെ വീടുകളുടെ ഭാഗമാണ്. മാത്രവുമല്ല, മാനസികാരോഗ്യം മെച്ചപ്പെടുത്താൻ വരെ കോയ് പോണ്ടുകൾ സഹായിക്കുന്നുണ്ട്. താത്പര്യമുള്ള ഒരാൾ വീട്ടിൽ ഉണ്ടായാൽ മതി വളരെ കാര്യക്ഷമമായി വീട്ടിലെ കോയ് പോണ്ട് കൈകാര്യം ചെയ്യാം.

എപ്പോൾ തുടങ്ങണം

കോയ് പോണ്ട് നിർമിക്കാൻ താൽപര്യമുണ്ടെങ്കിൽ അത് നേരത്തേ എൻജിനീയറെ അല്ലെങ്കിൽ ആർക്കിടെക്ടിനെ അറിയിക്കുന്നതാണ് നല്ലത്. വീടിന്റെ മുകളിലെ നിലകളിലാണ് ടാങ്ക് നിർമിക്കാൻ പ്ലാൻ എങ്കിൽ വെള്ളത്തിന്റെ ഭാരം കൂടി താങ്ങാൻ കഴിയും വിധത്തിൽ ശക്തിപ്പെടുത്തണം. ലാൻഡ്സ്കേ പ്പിന്റെ ഭാഗമായോ കോർട്യാർഡിലോ വരുന്ന കോയ് പോണ്ടിന്റെ നിർമാണം ഭിത്തി പ്ലാസ്റ്ററിങ് ചെയ്യുന്ന ഘട്ടത്തിൽ തുടങ്ങിയാൽ മതി.

ഒരു വാട്ടർ ഇൻലെറ്റ് പോയിന്റും ഒരു ഇലക്ട്രിക് പോയിന്റും പോണ്ടിനോടു ചേർന്ന് വേണം. ഇതിനുള്ള സംവിധാനം മാത്രം നേരത്തേ ചെയ്യണം.

ടാങ്കിന്റെ വലുപ്പം പ്രധാനം

വീടിനകത്തും പുറത്തും കോയ് പോണ്ട് നിർമിക്കാം. കുറഞ്ഞത് 5 X 3 അടി വലുപ്പമുള്ള പോണ്ട് എങ്കിലും വേണം കോയാർപിന് സ്വതന്ത്രമായി സഞ്ചരിക്കാൻ. രണ്ടര അടിയിൽ കൂടുതൽ ആഴം കൊടുക്കുന്നത് അപകടകരമാണ്, പ്രത്യേകിച്ച്, ചെറിയ കുട്ടികൾ ഉള്ള വീടുകളിൽ. ഇനി ചെറിയ കുട്ടികൾ ഇല്ലെങ്കിലും അതിഥികൾ ആയിപ്പോലും വീട്ടിൽ കുട്ടികൾ വരാം എന്ന് ഓർക്കണം.