കപ്പലേറിയ ക്യാമറ

ക്രൂസ്ഷിപ്പിൽ ഫൊട്ടൊഗ്രഫറായി ജോലി ചെയ്ത് 18 രാജ്യങ്ങൾ സന്ദർശിച്ച വൈപ്പിൻകാരി സി.ജെ.കാർമലിന്റെ പ്രചോദനം പകരുന്ന ജീവിതയാത്ര

- ഈശ്വരൻ ശീരവള്ളി

കൊച്ചിക്കായലിലേക്കു മിഴിനട്ടിരിക്കുമ്പോൾ പോലും സി.ജെ.കാർമൽ ഇങ്ങനെയൊരു സ്വപ്നം കണ്ടിരുന്നില്ല. ലോകത്തെ എറ്റവും വലിയ ആഡംബര കപ്പൽ കമ്പനികളിലൊന്നായ എംഎസി ക്രൂസിൽ ഫൊട്ടൊഗ്രഫർ എന്ന ജോലി, രണ്ടു വർഷം മുൻപു കാർമൽ ജീവിതത്തിലാദ്യമായി വിമാനത്തിൽ കയറുന്നത് ഈ ജോലിക്ക് ജോയ്ൻ ചെയ്യാനാണ്. മൂന്നു കണക്ടഡ് ഫ്ലൈറ്റുകളിലൂടെയുള്ള യാത്രയ്ക്കൊടുവിൽ ലോകത്തിന്റെ വടക്കേ അറ്റത്തുള്ള നോർവെയിലെ തുറുമുഖത്തു കാർമൽ ചെന്നിറങ്ങി.

ആഡംബര ക്രൂസിലെ ഫൊട്ടൊഗ്രഫറായ കാർമലിനെ സോഷ്യൽ മീഡിയയിലൂടെ പലർക്കു മറിയാം. പക്ഷേ, ആ ജോലിയിലേക്കു കാർമൽ എത്തിയ ജീവിതയാത്ര അറിയുന്നവർ ചുരുക്കം. ആർക്കും പ്രചോദനം പകരുന്ന കാർമലിന്റെ ജീവിതകഥ കേൾക്കാം.

കാർമലിന്റെ സ്വപ്നം

കുമ്പളങ്ങി സെന്റ് പീറ്റേഴ്സ് സ്കൂളിൽ നിന്ന് 2017 ൽ ഹയർ സെക്കൻഡറി പാസ്സായപ്പോൾ ജേണലിസം ഡിഗ്രി പഠിക്കണമെന്നായിരുന്നു കാർമലിന്റെ ആഗ്രഹം. “അഞ്ചാം ക്ലാസിൽ പഠിക്കുമ്പോൾ എനിക്ക് അച്ഛനമ്മമാരെ നഷ്ടമായി. അപ്പൂപ്പന്റെയും അമ്മൂമ്മയുടെയും സംരക്ഷണത്തിലാണ് കഴിഞ്ഞിരുന്നത്. പ്ലസ് ടു പരീക്ഷ കഴിഞ്ഞ അവധിക്കാലത്തു തന്നെ ജോലിക്കു കയറി. കൊച്ചിയിലെ സെന്റർ സ്ക്വയർ മാളിലുള്ള ബർഗർ കിങ്സിൽ ട്രയിനി ആയാണ് തുടക്കം. ബർഗർ ഉണ്ടാക്കാൻ പഠിച്ചു. പിന്നെ കസ്റ്റമേഴ്സിന്റെ ഫീഡ്ബാക് രേഖപ്പെടുത്തണം. അങ്ങനെ രണ്ടു മാസം പോയി. പത്താം ക്ലാസ് വരെയുള്ള എന്റെ പഠനത്തിനു തണൽ കൂടിയായിരുന്നു പള്ളുരുത്തി സെന് റീത്താസ് സ്കൂൾ. അവിടത്തെ അധ്യാപകർക്കും ഹെഡ്മിസ്ട്രസ്സിനും എന്നോടു വളരെ വാത്സല്യമായിരുന്നു. പ്ലസ് ടു പാസായപ്പോൾ സിസ്റ്റേഴ്സ് വിളിപ്പിച്ചു. ഈ വർഷം ഉടനെ പുതിയ കോഴ്സിനൊന്നും ചേരുന്നില്ലെങ്കിൽ ഉത്തർ പ്രദേശിൽ കോൺവെന്റ് നടത്തുന്ന ഗ്രാമീണ സ്കൂളിൽ അധ്യാപികയായി പോകാമോ എന്നു ചോദിച്ചു.

പ്രീപ്രൈമറി, പ്രൈമറി ക്ലാസ്സുകളിൽ പഠിപ്പിക്കണം, താമസവും ഭക്ഷണവും ഒപ്പം 8000 രൂപ ശമ്പളവും. ഒരു വർഷം ജോലി ചെയ്താൽ ഡിഗ്രി പഠിക്കാനുള്ള പണം സമ്പാദിക്കാമല്ലോ എന്നായിരുന്നു ചിന്ത. ഉത്തർപ്രദേശിലെ ജാലണിലുള്ള സെന്റ് പോൾസ് സ്കൂളിൽ എത്തി. ഒരു അധ്യയനവർഷം അവിടെ പ്രവർത്തിച്ചു.''

ജീവിതത്തിലെ ലൈഫ് ജാക്കറ്റ്