ഒരുമിച്ച് കിട്ടിയ ഭാഗ്യങ്ങൾ

ഹൃദയപൂർവം സിനിമയിലൂടെ മലയാളത്തിന്റെ ഹൃദയം സ്വന്തമാക്കിയ ടിസ് തോമസിന്റെ വിശേഷങ്ങൾ

- അമ്മു ജൊവാസ്

മുടിയാണ് കാരണം

ഈ വർഷം ജനുവരിയിലാണ് സംഭവം. എറണാകുളത്തെ ഹോട്ടലിൽ വച്ചു യാദൃച്ഛികമായി അനൂപ് സത്യനെ കണ്ടു. പരിചയപ്പെടാൻ ചെന്നപ്പോഴാണ് അറിയുന്നത് അനൂപേട്ടനും സത്യൻ അന്തിക്കാട് സാറുമൊക്കെ ഞാൻ അഭിനയിച്ച മുടി എന്ന ഷോർട് ഫിലിം കണ്ടിട്ടുണ്ട് എന്ന്. പരിചയപെട്ടു പിരിയുമ്പോൾ എനിക്കു പറ്റിയ റോൾ വല്ലതും ഉണ്ടേൽ പറയണേ' എന്നു പറഞ്ഞു. സിനിമാമേഖലയിലെ ആരെ കണ്ടാലും ചോദിക്കുന്നതാണിത്. പക്ഷേ, അനൂപേട്ടന്റെ മറുപടി കേട്ടു ഞാൻ വണ്ടറിടിച്ചു വാ പൊളിച്ചു പോയി. "ഒരു പരിപാടിയുണ്ട്. നിനക്ക് ഓഡിഷനു വരാൻ താൽപര്യമുണ്ടോ.' ഓൺലൈനായി ഓഡിഷൻ കഴിഞ്ഞു മൂന്നു ദിവസത്തിനുള്ളിൽ ഞാൻ സെലക്ടായി എന്നറിയിച്ചു. മൂന്നു മാസത്തിനുള്ളിൽ ഷൂട്ടും തുടങ്ങി. ബിപിൻ ബാബു എന്ന കഥാപാത്രം ഇത്രത്തോളം സ്നേഹം നേടുമെന്നൊന്നും അന്നു കരുതിയിരുന്നില്ല.

എൻജിനീയറിങ്ങും ടിക് ടോക്കും