മമിതയ്ക്കിത് ഭാഗ്യങ്ങളുടെ ഓണം

“കഴിഞ്ഞ വർഷം ഓണം ആഘോഷിക്കുമ്പോൾ ഈ മാറ്റം ഞാൻ പ്രതീക്ഷിച്ചതേയില്ല.” മമിത ബൈജു

- അഞ്ജലി അനിൽകുമാർ

പ്രേമലു' എന്ന സിനിമയിലൂടെ മമിത ബൈജു കവർന്നതു തെന്നിന്ത്യയുടെ മുഴുവൻ ഹൃദയമാണ്. തമിഴിൽ ചുവടുവച്ച ആദ്യ വർഷം തന്നെ മമിതയുടെ പേരു കേട്ടത് വിജയ്, ധനുഷ്, സൂര്യ എന്നിവരുടെ സിനിമകളിലും. പുതിയ സിനിമാ വിശേഷങ്ങളും ഓണാഘോഷ പ്ലാനും പങ്കുവയ്ക്കുന്നു മമിത.

പ്രേമലു 2 എവിടെയെന്ന ചോദ്യം ശക്തമായി ഉയരുന്നുണ്ടല്ലോ?

പ്രേമലു 2 ഉണ്ടാകുമെന്ന പ്രതീക്ഷയിലാണു ഞാനും. ചില പ്രത്യേക സാഹചര്യങ്ങൾ കാരണം ചിത്രീകരണം നീട്ടിവച്ചെന്നാണ് അറിയാൻ സാധിക്കുന്നത്. എല്ലാവരേയും പോലെ ഞങ്ങളും കാത്തിരിക്കുകയാണ്, ടീമിന്റെ റീയൂണിയന് വേണ്ടി.

ഗിരിഷേട്ടന്റെ "ബത്ലഹേം കുടുംബ യുണിറ്റി'ന്റെ ചിത്രീകരണം ഉടൻ ആരംഭിക്കും. നിവിൻ ചേട്ടനൊപ്പം രണ്ടാമത്തെ ചിത്രമാണ്. അദ്ദേഹത്തിനൊപ്പം അഭിനയിക്കുമ്പോൾ സ്കൂൾ, കോളജ് കാലഘട്ടം ഓർത്തുപോകും. ഞാൻ സ്കൂളിൽ പഠിക്കുമ്പോഴാണു മലർവാടി ആർട്ബും തട്ടത്തിൻ മറയത്തുമെല്ലാം ഇറങ്ങുന്നത്.

പ്രേമം ഇറങ്ങിയപ്പോൾ പിന്നെ എവിടെ നോക്കിയാലും കറുത്ത ഷർട്ടും വെള്ള മുണ്ടും മാത്രമായിരുന്നു. പറഞ്ഞു വരുന്നത് നിവിൻ ചേട്ടനുണ്ടാക്കിയ ഓളത്തെക്കുറിച്ചാണ്. അന്നു വിദൂര സ്വപ്നത്തിൽപ്പോലും അദ്ദേഹത്തിനൊപ്പം സിനിമ ചെയ്യുമെന്ന ചിന്ത ഇല്ലായിരുന്നു.

മമിതയുടെ ജീവിതത്തോടു കൂടുതൽ ചേർന്നു നിൽക്കുന്നതു സോനയാണോ റീനുവാണോ?

എന്റെ സ്വഭാവത്തോടു കൂടുതൽ നിൽക്കുന്നത് പ്രേമലുവിലെ റീനുവാണ്. പക്ഷേ, പലർക്കും റിലേറ്റ് ചെയ്യാൻ സാധിക്കുന്നതു സൂപ്പർ ശരണ്യയിലെ സോനയോടാണ്. എന്നാലിന്നെന്റെ ജീവിതത്തിൽ വളരെ പ്രധാനപ്പെട്ട സ്ഥാനമാണു സോനയ്ക്കുള്ളത്. കാരണം, സൂപ്പർ ശരണ്യയിൽ അഭിനയിക്കുന്ന സമയത്തു ശരണ്യയെപ്പോലെ ഉൾവലിഞ്ഞ സ്വഭാവമായിരുന്നു എനിക്ക്.