അവസരങ്ങളിലേക്കു വാതിൽ തുറക്കും നെറ്റ്വർക്കിങ്

ഏറെ സങ്കീർണമാണ് ഇപ്പോഴുള്ള തൊഴിൽ കമ്പോളം. ഇവിടെ കരിയർ നേടിയെടുക്കാൻ അടിസ്ഥാനപരമായി വേണ്ട ഒന്നാണ് നെറ്റ് വർക്കിങ്

- 

രാജ്യാന്തര തലത്തിൽ കരിയർ കെട്ടിപ്പടുക്കാനാഗ്രഹിക്കുന്നവർക്ക് അവശ്യം വേണ്ട ഒന്നാണ് നെറ്റ്വർക്കിങ് പാടവം. നെറ്റ് വർക്കിങ് വെറുമൊരു സ്കിൽ മാത്രമല്ല; വിജയത്തിനായുള്ള ഒരു അടിസ്ഥാന തന്ത്രമാണ്. ഭൂമിശാസ്ത്രപരമായ അതിരുകൾക്കപ്പുറത്തേക്കു പോകുന്ന പരസ്പര പൂരകമായ ബന്ധങ്ങളാണു കരിയറിൽ ഗുണമായി മാറുന്നത്. ഇതു തൊഴിൽ അവസരങ്ങളിലേക്കുള്ള വാതിലുകൾ തുറക്കുക മാത്രമല്ല, വിലമതിക്കാനാവാത്ത ഉൾക്കാഴ്ചകളും നൽകും.

ഇന്നത്തെ തൊഴിൽ കമ്പോളം സങ്കീർണമാണ്. മുൻ കാലങ്ങളിലേതു പോലെ ജോലി ചെയ്യുന്ന ഓഫിസിലുള്ളവരോ ആ സ്ഥാപനത്തിന്റെ വിവിധ ശാഖകളിലുള്ളവരോ നിങ്ങളുടെ ഉപഭോക്താക്കളോ ആയി മാത്രം ബന്ധപ്പെട്ടു കൊണ്ടുള്ള തൊഴിൽ ഘടനയല്ല ഇന്നുള്ളത്. ലോകത്തെ വിവിധ രാജ്യങ്ങളിലുള്ളവരും പല തൊഴിൽ മേഖലകളിൽ ജോലി ചെയ്യുന്നവരുമായി നിരന്തരം കണക്ട് ചെയ്യാനുള്ള സാധ്യതയേറെയാണ്.

പരസ്പരപൂരകങ്ങളായ ബന്ധങ്ങൾ തൊഴിൽ മേഖലയുമായി ബന്ധപ്പെട്ട് സൃഷ്ടിക്കേണ്ടതിന്റെ പ്രാധാന്യമാണു പറയുന്നത്. ഈ ലക്കം നെറ്റ്വർക്കിങ്ങിന്റെ സാധ്യത, രാജ്യാന്തരതലത്തിൽ കരിയർ കെട്ടിപ്പടുക്കുന്നതിൽ അതിനുള്ള പങ്ക്, വിവിധ നെറ്റ്വർക്കിങ് രീതികൾ, നിങ്ങളുടെ ഓൺലൈൻ സാന്നിധ്യം കരിയറിനെ എങ്ങനെ സ്വാധീനിക്കുന്നു, നെറ്റ്വർക്കിങ്ങിലെ ധാർമികത (ethical considerations), തൊഴിൽ നേടുന്നതിനായി നെറ്റ്വർക്കിങ് രീതികളെ എങ്ങനെ ഉപയോഗിക്കാം, എപ്പോൾ മുതൽ പ്രഫഷനൽ ബന്ധങ്ങൾ ഉണ്ടാക്കിയെടുക്കാൻ ശ്രമിക്കണം തുടങ്ങിയ കാര്യങ്ങളാണു വിശദീകരിക്കുന്നത്.

എന്താണ് നെറ്റ് വർക്കിങ് ?

പരസ്പരം പ്രയോജനകരമായ ബന്ധങ്ങൾ തൊഴിൽ സംബന്ധിയായി ബോധപൂർവം ഉണ്ടാക്കിയെടുക്കുന്നതിനെയാണ് ഇവിടെ നെറ്റ്വർക്കിങ് (networking) എന്നതുകൊണ്ട് ഉദ്ദേശിക്കുന്നത്. എന്നാൽ, പലരും കരുതുന്നതുപോലെ അടിസ്ഥാനപരമായി രണ്ടു വ്യക്തികൾ ബിസിനസ് കാർഡുകൾ കൈമാറുന്നതിലോ ലിൻക്ഡ്ഇൻ (Linked-In) ൽ പരസ്പരം ഫോളോ ചെയ്യുന്നതിലോ ഒതുങ്ങുന്നതല്ല ഇത്. അതിനപ്പുറം രണ്ടു വ്യക്തികൾക്കും പ്രയോജനകരമായ അവസരങ്ങളുടെ വഴികളാണ് ഇവിടെ തുറക്കുന്നത്.

തൊഴിലിലോ അതു സംബന്ധിയായ വിഷയങ്ങളിലോ മാർഗനിർദേശം നൽകാനോ അവസരങ്ങൾ നേടിത്തരാനോ സാധിക്കുന്നവരുമായി സൃഷ്ടിക്കേണ്ട ബന്ധങ്ങൾക്കാണ് ഇവിടെ പ്രാധാന്യം. അതുപോലെ നമ്മുടെ വൈദഗ്ധ്യവും പിന്തുണയും അവർക്കായി വാഗ്ദാനം ചെയ്യാൻ നമ്മളും ബാധ്യസ്ഥരാണ്. പരസ്പരമുള്ള അലിഖിതമായ ധാരണ എന്നു പറയാം.