ശ്രീരാമസ്വാമിയെ തൊഴുതുവലംവച്ച്

രാമായണമാസമായ കർക്കടകം വരുന്നു. ഭക്തിയുടെ മഴ നനഞ്ഞ് ഋക്കുകൾ ഒഴുകി വരുന്ന അന്യോന്യത്തിന്റെ നാട്ടിലേക്കാണ് ഈ യാത്ര കടവല്ലൂർ ശ്രീരാമസ്വാമിക്ഷേത്രത്തിലേക്ക്

- വി. ആർ. ജ്യോതിഷ്

മിഥുനമഴയിൽ വീശിയടിക്കുന്ന കാറ്റിൽ വേദമന്ത്രങ്ങളുടെ പ്രാചീനസ്വരങ്ങൾ, സന്ധ്യയ്ക്ക് രാജ ഭാവം കൈക്കൊള്ളുന്ന ശ്രീരാമസ്വാമിയുടെ ക്ഷേത്രം. ഋഗ്വേദപാലന പാരമ്പര്യത്തിലെ അത്യപൂർവമായ അനുഷ്ഠാനം നടക്കുന്ന ഭൂമി. കഥകളും ഉപകഥകളും കോദണ്ഡപാണിയായ ശ്രീരാമൻ ഐതിഹ്യങ്ങളും ചരിത്രവും സാംസ്കാരിക പൈതൃകവും നിറഞ്ഞ അന്യോന്യത്തിന്റെ നാട്; കടവല്ലൂർ.

മഴയുടെ മഞ്ഞുവെട്ടത്തിലൂടെ കാണാം കച്ചേരിമാളികയിൽ വിളക്കുകൾ ഒന്നൊന്നായി തെളിയുന്നു. ഉപദേവതാ ക്ഷേത്രത്തിലും കൂത്തമ്പലത്തിലും വിളക്കു തെളിച്ച് ശ്രീ രാമനു മുന്നിൽ ആദ്യത്തെ ദീപാരാധന, ശ്രീരാമസ്വാമിയുടെ നാലു ഭാവങ്ങളാണ് ഇവിടെ. വനവാസത്തിനു പുറപ്പെടുന്ന ഭാവം. വരുണനോടു കോപിക്കുന്ന ഭാവം, പട്ടാഭിഷേ കം കഴിഞ്ഞ് രാജാധികാരം കൈക്കൊള്ളുന്ന രാജഭാവം. പിന്നെ, അർധരാത്രിക്കുശേഷം ശങ്കരനാരായണഭാവം.

രാജഭാവത്തിൽ കുടികൊള്ളുന്ന ശ്രീരാമനെ തൊഴുതു ക്ഷേത്രമൊന്നു വലംവയ്ക്കുമ്പോൾ നാം അറിയുന്നു ജ്ഞാനത്തിന്റെ അടയാളപ്പെടുത്തലുകൾ; കാലം കടന്നു വന്ന വഴിത്താരകൾ.

കോദണ്ഡപാണിയായ ശ്രീരാമൻ

മഹാക്ഷേത്രങ്ങളുടെ വാസ്തുവിദ്യാ സവിശേഷതകളും താന്ത്രിക കർമങ്ങളുടെ പൂർണതയുമാണു കടവല്ലൂർ ശ്രീ രാമസ്വാമി ക്ഷേത്രത്തിന്റെ പ്രത്യേകത. എണ്ണൂറു വർഷത്തിലേറെ പഴക്കമുണ്ടെന്നു കരുതുന്നു. ഏറെ വിശേഷപ്പെട്ട ഇരുനില ശ്രീകോവിലാണ് ഇവിടുത്തെ പ്രത്യേകത. ശ്രീകോവിലിനു ചുറ്റുമായി അതിപുരാതനമായ 29 ദാരുശിൽപങ്ങൾ. തടിയിൽ കൊത്തിയെടുത്ത അദ്ഭുതങ്ങൾ. സീതാപഹരണവും മുടി പിന്നിക്കെട്ടുന്ന സ്ത്രീയും ജീവനുള്ള ദൃശ്യങ്ങളായി തോന്നും. സീതാപഹരണത്തിൽ സീതയുടെ നിസ്സഹായതയും രാവണന്റെ ക്രോധവും കൊത്തിവച്ച ശില്പിയെ നമിക്കണം.

പുരാണങ്ങളിൽ കടവല്ലൂരിനെ സംബന്ധിക്കുന്ന ഒട്ടേറെ പരാമർശങ്ങൾ ഉണ്ട്. ഭാർഗവപുരാണത്തിൽ ഭാർഗവ ക്ഷേത്രത്തിലെ ഏറ്റവും പുണ്യമായ സ്ഥലം ഏതെന്ന ചോദ്യത്തിനു ഘടോൽകചപുരമെന്നു മറുപടിയുണ്ട്. കടവല്ലൂരിന്റെ യഥാർഥ പേരാണ് ഘടോൽകചപുരം. അതിനു കാരണം ഇവിടുത്തെ സവിശേഷമായ ശ്രീരാമവിഗ്രഹം പ്രതിഷ്ഠിച്ചത് ഘടോൽകചനാണ് എന്ന വിശ്വാസമാണ്.