Style UPDATED

സിനിമയിൽ പത്താം വർഷത്തിലേക്കു കടക്കുമ്പോൾ രജീഷ വിജയൻ പുതിയ മാറ്റങ്ങളുടെ വഴിയിലാണ്

- രൂപാ ദയാബ്ജി

കുറച്ചു ദിവസം മുൻപു രജീഷ് സോഷ്യൽ മീഡിയയെ ഒന്നു ഞെട്ടിച്ചു. ബോഡി ട്രാൻസ്ഫർമേഷനിലൂടെ 15 കിലോ ഭാരം കുറച്ചു പുതിയ ലുക്കിൽ ഒരു വിഡിയോ. സോഷ്യൽ മീഡിയയിൽ തരംഗമായ ആ വിഡിയോയ്ക്കു പിന്നാലെയാണ് ആ മാറ്റത്തിനു പിന്നിലെ രഹസ്യത്തെക്കുറിച്ചു രജീഷ വനിതയോടു സംസാരിച്ചത്. സിനിമയിലെ പുതിയ വിശേഷങ്ങളും സ്വപ്നങ്ങളും ആ സംസാരത്തിൽ നിറഞ്ഞു.

പുതിയ ലുക്കിൽ ഞെട്ടിച്ചല്ലോ ?

കിഷാന്ത് സംവിധാനം ചെയ്യുന്ന മസ്തിഷ്ക മരണം എന്ന സിനിമയ്ക്കായാണ് ലുക്കിൽ മാറ്റം വരുത്തിയത്. അതിലെ മോഡേൺ വേഷത്തിന് ഈ ചെയ്ഞ്ച് വേണം.

മുൻപു പല സിനിമകൾക്കു വേണ്ടിയും ഭാരം കൂട്ടുകയും പെട്ടെന്നു കുറയ്ക്കുകയും ചെയ്തിട്ടുണ്ട്. അതൊന്നും ശരിയായ രീതിയിൽ അല്ലായിരുന്നു എന്ന് ഇപ്പോഴറിയാം. അതുകൊണ്ട് ഇത്തവണ ഷിഫാസ് എന്ന ട്രെയ്നറുടെ കീഴിൽ വെയ്റ്റ് ലോസ് വിത് മസിൽ ഗെയ്ൻ പ്ലാൻ എടുത്തു. ആറു മാസം കൊണ്ടു 15 കിലോ കുറച്ചു.

രണ്ടു വർഷമാകുന്നു രജിഷയെ മലയാളത്തിൽ കണ്ടിട്ട്. മറ്റു ഭാഷകളിൽ തിരക്കാണോ ?

മധുരമനോഹര മോഹമാണ് അവസാനം റിലീസായത്. തമിഴിൽ രണ്ടു സിനിമകൾ ചെയ്തു, കാർത്തി നായകനാകുന്ന സർദാർ ടുവും ധ്രുവ് വിക്രമിനൊപ്പം ബൈസണും. രണ്ടും ദീപാവലി റിലീസാണ്. മലയാളത്തിലും തമിഴിലും ഹിന്ദിയിലും ഓരോ പ്രോജക്ടുകൾ ഉണ്ട്. കളം കാവലാണു മലയാളത്തിൽ റിലീസാകാനുള്ളത്. മമ്മൂക്കയ്ക്കൊപ്പം വേഷമെന്ന സ്വപ്നമാണ് അതിലൂടെ സാധിച്ചത്.

കോവർടി എന്ന ഷോർട് ഫിലിമാണു പിന്നെയുള്ളത്. നെറ്റ്ഫ്ലിക്സിനു വേണ്ടി ഒരുപാടു ഹിറ്റു സീരിസുകൾ ചെയ്ത മുംബൈ മലയാളിയായ ദോഹിനാണ് അതിന്റെ സംവിധായകൻ. ആദ്യമായി ഞാനഭിനയിച്ച ഷോർട്ട് ഫിലിമാണത്. മുംബൈ ഫിലിം ഫെസ്റ്റിവലിന്റെയും ആപ്പിളിന്റെയും കൊളാബറേഷനായതു കൊണ്ടുതന്നെ സിനിമ ഷൂട്ട് ചെയ്തിരിക്കുന്നത് ഐഫോണിലാണ്. മുംബൈയിലെ ആദ്യ സ്ക്രീനിങ്ങിനു ഷബാന ആസ്മി അടക്കമുള്ള താരങ്ങളുണ്ടായിരുന്നു. ജാവേദ് അക്തർ ഈ സിനിമ കണ്ടു കരഞ്ഞു. സിനിമ തരുന്ന ഭാഗ്യങ്ങളാണ് ഇത്തരം നിമിഷങ്ങൾ.

സിനിമയിലെത്തിയതും അങ്ങനെയൊരു ഭാഗ്യത്തിലാണല്ലോ?