ശരീരവും മനസ്സും തിരിച്ചറിയാം

വ്യക്തിയുടെ ആരോഗ്യം മാത്രമല്ല സമൂഹത്തിന്റെ ആരോഗ്യവും പ്രധാനമാണ്

- ഡോ.സൗമ്യ സരിൻ, മെഡ് കെയർ ഹോസ്പിറ്റൽ, ഷാർജ ശിശുരോഗവിദഗ്ധയായ ഡോ സൗമ്യ സരിൻ ഹെൽത് പ്ലോഗർ ആണ്. സാമൂഹിക രംഗത്തും ആരോഗ്യ മേഖലയിലും ചലനമുണ്ടാക്കിയ നിരവധി വിഡിയോസ് ചെയ്തിട്ടുണ്ട്

വ്യക്തിയുടെ ആരോഗ്യം ശരീരത്തിന്റെയും മനസ്സിന്റെയും മാത്രമല്ല. വ്യക്തി സമൂഹത്തിൽ ഇടപെടുന്ന രീതിയും കൂടിയായി മാറി. തെറ്റായ ആരോഗ്യ ചിന്തകൾ സോഷ്യൽ മീഡിയയിൽ പങ്കു വയ്ക്കുന്നതും പുതിയ കാലത്ത് അനാരോഗ്യമായി കണക്കാക്കാം. ഇതൊക്കെ തിരിച്ചറിഞ്ഞു ചികിത്സിച്ച് ആരോഗ്യമുള്ള വ്യക്തിയാകാൻ മേക്ക് ഓവർ ടിപ്സ്.

ഡയറ്റ് കൃത്യമാക്കുക. എല്ലാ പുതുവർഷത്തിലും ആദ്യം എടുക്കുന്ന അഞ്ച് തീരുമാനങ്ങളിൽ ഒന്ന്. പക്ഷേ, പലപ്പോഴും രണ്ട് ആഴ്ച കഴിയുമ്പോൾ മറന്നു പോകും; അതാണു പലർക്കും ഡയറ്റ്. അതുകൊണ്ടു തന്നെ നാളെ മുതൽ ഇതൊക്കെ ഉപേക്ഷിക്കും എന്ന് ഒറ്റയടിക്കു തീരുമാനം എടുക്കാതെ പതുക്കെ ഡയറ്റ് കൃത്യമാക്കുക.

ഇൻ ആന്റ് ഔട്ട്: കാർബോഹൈഡ്രേറ്റ് അടങ്ങിയ ഭക്ഷണങ്ങളായ ധാന്യ വർഗങ്ങൾ കുറച്ച് പ്രോട്ടീൻ കൂടുതലുള്ള പയർ പരിപ്പുവർഗങ്ങളും നോൺവെജ് വിഭവങ്ങളും കൂടുതലായി കഴിക്കുക. അതിൽ ബീഫ് പോലുള്ള ചുവന്ന മാംസാഹാരങ്ങൾ കുറയ്ക്കുക. എണ്ണയുടെ ഉപയോഗം പരിമിതമാക്കുക. പച്ചക്കറികളും പഴവർഗങ്ങളും ആഹാരത്തിൽ കൂടുതൽ ഉൾപ്പെടുത്താം

വ്യായാമം: നടക്കാതെ പോവുന്ന തീരുമാനങ്ങളുടെ കൂട്ടത്തിൽ ഡയറ്റിന്റെ കൂട്ടുകാരനാണ് വ്യായാമം. തുടങ്ങും പക്ഷേ, പാതിക്കു വച്ചു നിന്നു പോകും. എന്നാൽ വ്യായാമം ശീലമാക്കി മാറ്റുകയാണ് വേണ്ടത്. ഒരു ദിവസം 45 മിനിറ്റെങ്കിലും വ്യായാമം ചെയ്യുക.