യുട്യൂബിലെ ലിറ്റിൽ സ്റ്റാർസ്

യുട്യൂബിലെ താരങ്ങളായ ഈ കുട്ടികളുടെ സബ്സ്ക്രൈബേഴ്സിന്റെയും ഫോളോവേഴ്സിന്റെയും എണ്ണം എത്രയെന്നോ?

- രൂപ ദയാബ്ജി

ഹലോ ഗയ്സ്... നിങ്ങൾ വായിക്കുന്നത് വനിതയുടെ ശിശുദിന പതിപ്പിലെ പ്രത്യേക ഫീച്ചറാണ്. ശിശുദിനമെന്നു പറയുമ്പോൾ കുട്ടികളുടെ ദിവസമാണല്ലോ. സോ... കുട്ടിദിന സ്പെഷൽ ഫീച്ചറിലും കുറച്ചു കുട്ടികളെയാണു പരിചയപ്പെടുത്തുന്നത്.

സ്പെഷൽ പതിപ്പിൽ സ്പെഷലായി എത്തുന്ന ഈ കുട്ടികളുടെ പ്രത്യേകത എന്താണെന്നാകും ഗയ്സ് നിങ്ങളി പ്പോൾ ചിന്തിക്കുന്നത്. ഇവരെല്ലാം യുട്യൂബിലെ സ്റ്റാർസാണ്. യുട്യൂബിന്റെ പുഷ്കലകാലത്തു വിഡിയോകൾ പോസ്റ്റ് ചെയ്തു തുടങ്ങി, ഇപ്പോൾ സോഷ്യൽ മീഡിയയിൽ മെഗാഹിറ്റായി മുന്നേറുന്ന മൂന്നു കുട്ടികളാണു ഗയ്സ് ഇവർ. കേരളത്തിലെ പത്തു വയസ്സിനു താഴെ പ്രായമുള്ള കുട്ടികളുടെ യുട്യൂബ് ചാനലുകളിൽ ഒരു വർഷം കൊണ്ട് ഒരു മില്യൺ കടന്നു റെക്കോർഡ് നേടിയ ടിയക്കുട്ടിയാണ് ആദ്യത്തെ താരം.

750 ഓളം വിഡിയോകൾ കൊണ്ടു പതിനെട്ടര ലക്ഷം സബ്സ്ക്രൈബേഴ്സിനെ നേടിയ മിൻഷയും വെറും 90 വിഡിയോ കൊണ്ടു ഏഴു ലക്ഷം സബ്സ്ക്രൈബേഴ്സിനെ നേടിയ നിധിനുമാണ്. സോറി ഗയ്സ് നിധിനെന്നു പറഞ്ഞാൽ നിങ്ങൾക്കു ചിലപ്പോൾ മനസ്സിലാകില്ല, ശങ്കരനെന്നു വിളിപ്പേരുള്ള നിധിനുമാണ് ഈ കുട്ടി സ്റ്റാർസ്. ഇവരുടെ വിശേഷങ്ങൾ കേട്ടിട്ടു വന്നാലോ...

സ്റ്റാർ 1 - ടിയക്കുട്ടി
സബ്സ്ക്രൈബേഴ്സ് - 28.5 ലക്ഷം

 ഹൈക്കോടതി അഭിഭാഷകനും ബിസിനസ്സുകാരനുമായ പാലക്കാട്ടെ അഡ്വ. രജീഷ് ചാത്തംകുളം ഭാര്യ നിമിഷയ്ക്കു വിവാഹവാർഷിക സമ്മാനമായി വാങ്ങി കൊടുത്ത ഐപാഡിൽ നിന്നാണു കഥ തുടങ്ങുന്നത്. പൂക്കളും പൂമ്പാറ്റകളുമൊക്കെയായിരുന്നു പേജിൽ ആദ്യം പടമായത്. ഇരുപതിനായിരത്തിലധികം ഫോളോവേഴ്സുണ്ടായിരുന്ന ആ പേജിലൂടെയാണു ടിയക്കുട്ടി എന്ന യുട്യൂബ് സ്റ്റാർ ഉദിച്ചുയർന്നത്.

ഒരു ലീവ് തരോ...

അഭിനയിക്കാൻ മിടുക്കിയായിരുന്നു ടിയക്കുട്ടി. കുഞ്ഞു വിഡിയോകൾ  ഹിറ്റായ കാലത്താണു സോഷ്യൽ മീഡിയയോടു ഹരം കയറിയതെന്നു ടിയക്കുട്ടി പറയുന്നു. “ടിക് ടോക്കിലെ മിക്ക വിഡിയോസിനും നല്ല വ്യൂസ് കിട്ടി. നാലു ലക്ഷത്തോളം ഫോളോവേഴ്സുമായി വിജയകരമായി പോകുന്നതിനിടെയാണ് ആ ദുഃഖവാർത്ത, ടിക് ടോക് നിരോധിക്കുന്നു. പക്ഷേ, തളർന്നില്ല. അപ്പോൾ തന്നെ യുട്യൂബ് ചാനൽ തുടങ്ങി.