പ്ലാന്റർ സ്റ്റാൻഡ് തലയുയർത്തി നിൽക്കട്ടെ

 പ്ലാന്റർ സ്റ്റാൻഡുകളെ പരിചയപ്പെടുന്നതിനൊപ്പം അവയുടെ പരിപാലനം കൂടി അറിഞ്ഞോളൂ

- 

പച്ചപ്പും ഹരിതാഭയും വീട്ടിനുള്ളിൽ നിറയ്ക്കാൻ വീടു നിറയെ ചെടികൾ നിരത്തുന്നത് അൽപം പഴയ കാര്യമാണ്. പകരം മനോഹരമായ പ്ലാന്റർ സ്റ്റാൻഡുകൾ നൽകി അവയ്ക്കു മുകളിൽ വ്യത്യസ്തമായ കുറച്ചു ചെടികൾ നന്നായി അറേഞ്ച് ചെയ്യുകയാണ് ഇപ്പോൾ വീടിനുള്ളിൽ "ഇൻ' ആയ സ്റ്റൈൽ.

പക്ഷേ, പ്ലാന്റർ സ്റ്റാൻഡുകൾ തിരഞ്ഞെടുക്കുമ്പോൾ ചില കാര്യങ്ങൾ ശ്രദ്ധിക്കണം. ഇതിൽ പ്രധാനം സാധാരണ തടി കൊണ്ടുള്ളവ വെള്ളം നനഞ്ഞാൽ ഭംഗി നഷ്ടപ്പെട്ട് നശിക്കാം. അതുകൊണ്ട് ട്രീറ്റഡ് വുഡ് സ്റ്റാൻഡുകൾ ഉപയോഗിക്കുന്നതാകും ഉചിതം.

 മെറ്റൽ സ്റ്റാൻഡുകൾ തിരഞ്ഞെടുക്കുമ്പോൾ സ്റ്റെയിൻലെസ് സ്റ്റീലോ, ഗാൽവനൈസ് അയൺ പൈപ്പുകളോ (ജിഐ) ഉപയോഗിക്കാം. സാധാരണ മെറ്റൽ സ്റ്റാൻഡുകളാണെങ്കിൽ പ്രൈമർ കോട്ടിങ് നൽകി പെയിന്റ് ചെയ്യുകയോ പൗഡർ കോട്ടിങ് നൽകി ഭംഗി കൂട്ടുകയോ ചെയ്യാം. ആഴ്ചയിലൊരിക്കൽ പൊടി തുടച്ച് വൃത്തിയാക്കാൻ മറക്കല്ലേ.

മോക്കോവർ നൽകിയ പ്ലാന്റർ സ്റ്റാൻഡ്

പഴയ ഏണി, കസേര, ജനാലയുടെ ഫ്രയിം, കട്ടിലിന്റെ ചാര്... ഇവയൊക്കെ പ്ലാന്റ് സ്റ്റാൻഡാക്കി മാറ്റാം. വൃത്തിയാക്കി പോളിഷ് ചെയ്തെടുക്കണോ പഴമയോടെ തന്നെ വയ്ക്കണോ എന്നത് ഇന്റീരിയർ സ്റ്റൈൽ അനുസരിച്ച് തീരുമാനിച്ചോളൂ...