போன உயிர் திரும்புமா?

வேறு எந்த மாநிலத்திலும் இல்லாத அளவுக்கு உயர் கல்வி படிக்கும் பெண்களின் எண்ணிக்கையில் தமிழ்நாடே முதலிடம் வகிக்கிறது என்பது பெருமை தரும் செய்தியாகும்.

- ஓவியா, பெரியாரிய செயற்பாட்டாளர், பெண்ணிய சிந்தனையாளர்

அதேபோல், பணியாற்றும் பெண்களிலும் தமிழ்நாடே முதலிடம் வகிக்கிறது. தமிழ்நாடு தொடர்ந்து சமூக நீதிப் பாதையில் பயணிப்பதே இதற்குக் காரணம். இந்தப் பெருமையில் நாம் திளைத்துக் கொண்டிருக்கும் போது, வரதட்சணை கொடுமையால் முதுகலை பட்டதாரி பெண் தற்கொலை செய்து கொண்டிருக்கிறார்.

அதுவும் தன் தந்தைக்கு செல்பேசியில் (வாட்ஸ்அப்பில்) குரல் பதிவை அனுப்பிவிட்டு வாழ்க்கையை முடித்துக் கொண்டிருக்கிறார். இத்தனைக்கும் அந்தப் பெண்ணுக்கு 300 சவரனுக்கு அதிகமாக தங்க நகைகள் போட்டு 2 மாதங்களுக்கு முன்பு தான் திருமணம் செய்து வைத்திருக்கிறார்கள்.

மேலும் வரதட்சணை கேட்டு அந்தப் பெண்ணை மணமகன் வீட்டார் கொடுமை செய்ய, அந்தப் பெண்ணும் வாழ்க்கையை முடித்துக் கொண்டிருக்கிறார்.

இது குறித்து பெரியாரிய செயற்பாட்டாளரும் பெண்ணிய சிந்தனையாளருமான ஓவியா தமது கருத்துகளைப் பதிவு செய்கிறார்.

‘இந்தப் பெண் ஒரு வசதியான குடும்பத்திலிருந்து வந்திருக்கிறார். பொதுமக்கள் மத்தியில் அவரது மரணம் நடந்திருக்கிறது. அவரை மருத்துவமனையில் சேர்த்தும் பலனின்றி இறந்து போனார்.

இந்தப் பெண் மட்டுமல்ல, பல்லாயிரக் கணக்கான பெண்களின் வாழ்க்கை நிலை இப்படித்தான் இருக்கிறது. பெண்களிடம் மாற்றம் இருக்கிறது, முன்னேற்றம் நடந்திருக்கிறது, பல சாதனைகள் பெண்கள் செய்திருக்கிறார்கள்.

முன்பைவிட இப்போது தங்கள் விருப்பங்களைத் தைரியமாக வெளியே சொல்கிறார்கள். ஆனாலும் அஞ்சி, நடுங்கி எதையும் பேச முடியாமல் வாழ்கிற பெண்களின் எண்ணிக்கையே அதிகமாக இருக்கிறது. அல்லது சாதனை செய்த பெண்களின் எண்ணிக்கையை ஒப்பீடு செய்து பார்த்தால், வேதனையைத் தாங்கிக் கொண்டு வேறு வழியின்றி வாழுகிற பெண்களின் எண்ணிக்கை தான் அதிகம். படித்த பெண்களும் இதில் அடங்குவர்.

படிப்பினால் பெண்களுக்குத் தன்னம்பிக்கை வருவதில்லை. ஆணாகப் பிறந்ததால் ஆணுக்குத் தன்னம்பிக்கை வருகிறது.

எதுவும் இல்லாமல் ஆண்களால் இந்த சமுதாயத்தில் தனித்து நிற்க முடியும். ஆனால் ஒரு பெண்ணால் முடியாது. அதில் தான் இங்கு பெரும் சிக்கல்கள் எழுகின்றன.

இரு குடும்பங்களும் வசதி படைத்தவர்களாகத்தான் இருக்கிறார்கள். இவர்கள் நடந்து கொண்டதைப் பார்த்தால், 100 ஆண்டுகளுக்கு முன்பு இருந்த வழக்கத்தைப் போல் இருக்கிறது.