சிறுநீரகச் செயலிழப்பை தடுப்பது சாத்தியமே!

தமிழ்நாட்டில் சிறுநீரக செயலிழப்பை தொடக்க நிலையிலேயே கண்டறிந்து, அதற்கு சிகிச்சை அளிக்கும் விதமாக, கடந்த 2023ஆம் ஆண்டு, ஜூலை மாதம் 'சிறுநீரகம் காக்கும் சீர்மிகு மருத்துவ திட்டம்' தொடங்கப்பட்டது.

- 

இத்திட்டத்தின் கீழ், நீரிழிவு நோயாளிகள், ரத்த அழுத்தம் உள்ளவர்கள், 30 வயதுக்கு மேற்பட்டவர்களுக்கு சிறுநீரக பரிசோதனை மேற்கொள்ளப்பட்டு வருகிறது.

இத்திட்டம் குறித்து அண்மையில் தமிழ்நாடு பொதுச் சுகாதாரத் துறை கூறும்போது, 'வேளாண் தொழிலாளர்கள், கட்டட வேலை செய்வோருக்கு சிறுநீரகப் பாதிப்பு ஏற்பட வாய்ப்பு உள்ளது.

இதுதவிர, தமிழ்நாட்டில் நீரிழிவு நோயாளிகள், உயர் இரத்த அழுத்தம் கொண்டவர்கள் என 2 கோடி பேர் உள்ளனர். சிறுநீரக செயலிழப்பால் இவர்களும் பாதிக்கப்படக்கூடும்.

1.07 கோடி பேருக்கு பரிசோதனை செய்ததில் 33,869 பேருக்கு தொடக்க கட்ட அறிகுறிகள் கண்டறியப்பட்டுள்ளன.

அவர்கள் மேல் சிகிச்சைக்காக மருத்துவக் கல்லூரி மருத்துவமனைக்குச் செல்ல பரிந்துரை செய்யப்பட்டுள்ளது. 'தொடக்க நிலையிலேயே சிறுநீரக பரிசோதனை செய்து சிகிச்சை அளிக்கப்படுவதால் சிறுநீரக செயலிழப்பைத் தடுக்க முடியும்' என்றனர்.

சிறுநீரகச் செயலிழப்பு ஏன் ஏற்படுகிறது, அதற்கான அறிகுறிகள் என்ன, தடுக்கும் வழிமுறைகள் என்ன என்பது குறித்து சிறுநீரகவியல் மருத்துவர்கள் பகிர்ந்த தகவல்கள் இங்கே...

'சிறுநீரகம் சார்ந்த நோய்களை இரண்டாகப் பிரிக்கலாம். ஒன்று, தடுக்கக்கூடிய சிறுநீரக சிக்கல்கள், மற்றொன்று தடுக்க இயலாத சிறுநீரக சிக்கல்.

தடுக்கக்கூடிய சிறுநீரகப் பிரச்சினைகள், நம்முடைய வாழ்வியல் மாற்றங்களால் ஏற்படுகின்றன. அதில், முதன்மையாக நீரிழிவு, இரத்த அழுத்தம் ஆகிய வாழ்வியல் நோய்களால் சிறுநீரக சிக்கல்கள் அதிகம் ஏற்படுகின்றன. இவற்றை நாம் தடுக்க முடியும்.

ஆனால், மரபியல் ரீதியாக ஏற்படும் சிறுநீரக 'சிக்கல்களை நாம் தடுக்க முடியாது' என்கிறார்கள் சிறுநீரகவியல் வல்லுநர்கள்...

'தொடக்கத்தில் நாம் வேட்டையாடும் சமூகங்களாக இருந்தோம். அதன்பின், வேளாண்மை செய்ய தொடங்கினோம். இப்போது, கடைகள், உணவகங்களில் சாப்பிடத் தொடங்கி, வீட்டுக்கே இன்று உணவு வருகின்றது.

துரித உணவுகளை அதிகமாகச் சாப்பிடுகிறோம். இப்படியான சூழலில் நம் உடலுக்கு எது சிறந்தது என்பதை அறிந்து உண்ண வேண்டும். அதுதான், நம் சிறுநீரகங்களைக் காப்பதற்கு நாம் செய்யும் அதிகபட்ச தடுப்பு வழியாக இருக்கும்.

சிறுநீரக ஆரோக்கியம் என்று வரும்போது, நாம் எடுத்துக்கொள்ளும் உப்பு, சர்க்கரையில் அதிக அக்கறை செலுத்த வேண்டும்.