மனித உரிமைகளும், பெண்களின் முன்னேற்றமும்...!

வ்வொரு ஆண்டும் டிசம்பர் மாதம் 10ஆம் நாள் உலகமெங்கும் மனித உரிமை விழிப்புணர்வு நாளாக 1948ஆம் ஆண்டு முதல் அய்க்கிய நாடுகளின் சபை மூலமாக கொண்டாடப்படுகிறது.

- வழக்கறிஞர் அன்பு

நமது நாடு விடுதலை அடைந்து அரசியல் சாசனத்தின் வழியாக குடியரசாக மாறியும் 75 ஆண்டுகளை கடந்து விட்டது. 2024 நவம்பர் 25ஆம் நாள் ஐ.நா சபை வெளியிட்ட அறிக்கையின்படி ‘உலகம் முழுவதும் ஒவ்வொரு 10 நிமிடத்திற்கும் ஒரு பெண் சித்திரவதை மூலம் படுகொலை செய்யப்படுகிறாள்' என்ற தகவலை தெரிவித்துள்ளது. பெண்களுக்கு எதிரான வன்முறையை ஒழிப்பதற்கான சர்வதேச நாள் நவம்பர் 25ஆம் நாள் கடைப்பிடிக்க தொடங்கி ‘பெண்களுக்கு எதிரான வன்முறையை அகற்ற ஒன்றிணைவோம்' என்ற முழுக்கத்தின் அடிப்படையில் டிசம்பர் 10 ஆம் நாளான மனித உரிமை பிரகடன நாள் வரையில் சுமார் 16 நாட்கள் விழிப்புணர்வு நாட்களாக பரப்புரை மேற்கொள்ளப்படுகிறது. கடந்த நவம்பர் 25ஆம் நாள் ஐ.நா பெண்கள் அமைப்பு வெளியிட்டுள்ள அறிக்கையின்படி 2023 ஆம் ஆண்டில் மட்டும் உலகம் முழுவதும் தங்களது பெற்றோர், கணவர், காதலர், குடும்ப உறுப்பினர் மூலமாக பெண்கள் உடலியல் ரீதியான மற்றும் பாலின கொடுமைகளை அனுபவிப்பவர்களில் எண்ணிக்கை கோடிக்கணக்கில் பெருகி வருவது கவலையளிப்பதாக அவ்வறிக்கை குறிப்பிடுகிறது. கடத்தப்படும் பெண்களில் 10 நபர்களில் 4 பேர் பெண்களாகவும், அதில் இருவர் பதின் பருவப் பெண்கள் என்றும் பாலியல் சுரண்டலுக்காகவே 90% பெண்கள் கடத்தப்படுவதாகவும் பெண்கள், சிறுமிகளுக்கு குடும்ப உறுப்பினர்களால் கொடுமைகள் பெருகி வருகின்றன என்ற அதிர்ச்சிகரமான புள்ளி விவரங்களை வெளியிட்டுள்ளனர். வயதான பெண்கள், மாற்றுத்திறனாளி பெண்கள், பெண் குழந்தைகள் ஆகியோருக்கு எதிரான வன்முறைகளில் இருந்து அவர்களை பாதுகாக்க சிறப்பு கவனம் செலுத்த வேண்டும் என உலக சுகாதார அமைப்பு வலியுறுத்துகின்றது. இதற்கு தமிழ்நாடு பெண்கள் விதி விலக்கா என்ன?

தமிழ்நாட்டின் பெண்களின் நிலைமை!