நமது சமுதாயம் முன்னேற நாம் சிந்திக்கிறோமா?

தமிழ்நாட்டுப் பள்ளிகளில் நன்றிப் பெருக்கோடு விழா எடுக்கப்படும் நாள்.

- காசு.நாகராசு

கல்விக் கண் திறந்த காமராசர் பிறந்த நாள் என்று அந்த நாளுக்குப் பெயர். அரசின் சார்பிலேயே நாடு முழுவதும் நடத்தப்படுகிறது இவ்விழா.

அது என்ன கல்விக் கண் திறந்த காமராசர்? அப்படியானால் காமராசர் திறந்து வைப்பதற்கு முன் நமக்கு கல்விக் கண் இல்லையா நமது முன்னோர்கள் எல்லாம் கல்வி பெறாத அறிவுக் குருடர்களாகவா இருந்தனர்?

அரசுப் பள்ளிகள் மட்டுமல்லாது. மெட்ரி குலேசன், சிபிஎஸ்சி கேந்திர வித்யாலயா, வோர்ல்டு ஸ்கூல், ப்ளேஸ்கூல் என்று பல்கிப் பெருகியிருக்கிற இன்றைய கல்விக் கூடங்களுக்குள் சென்று திரும்புகிற நமது பிள்ளைகளிடம் மேற்கண்டவாறு கேள்விகள் எழுவது இயல்புதான்.

இது 2024; காமராசருக்கு 121 வயது ஆகிறது. அவர் மறைந்தே 40 ஆண்டுகள் உருண்டோடிப் போய்விட்டன. ஆக இன்றைய இளம் தலைமுறையிடம் கேள்விகள் எதிர்மறையாய் எழ வாய்ப்புள்ளது. அதனாலேயே அந்தக் கேள்விகளுக்கு விடை கூறுவதற்காகவே 2006-2011 காலகட்டத்தில் பொறுப்பிலிருந்த அன்றைய அரசு, பள்ளிகளில் இந்த விழாவைக் கொண்டாடச் செய்திருக்கிறது. வழக்கம்போல் தலைவர்களின் பிறந்த நாட்களுக்கு வழங்கப்படுவது போல் விடுப்பை அறிவித்திருந்தால் அது பிள்ளைகளுக்கு வெறும் மகிழ்ச்சியான நாள் அவ்வளவுதான். மாறாக, ஜூலை 15 ஆம் நாளை விழா எடுக்கவைப்பதன் மூலமாகத்தான் காமராசரின் உழைப்பை, சிந்தனையை, அதன் விளைவை வளரும் தலைமுறைப் பிள்ளைகளிடம் விதைக்க முடியும் என்று கருதியிருக்கிறது அன்றைய அரசு.

ஆனால், எதார்த்தத்தில் சுதந்திரம் என்பது மிட்டாய் தின்கிற நாள் என்பதைப் போல காமராசர் பிறந்த நாளும் பெரிதாக கருத்துப் பரப்பலோ, புரிதலோ இல்லாமல்தான் போகிறது. இந்த இடைவெளியை சரி செய்ய வேண்டும் என்கிற முயற்சியாகவே இந்த கட்டுரையை வழங்குகிறது தங்க மங்கை. மேலும் தமிழ்நாட்டிலிருக்கிற அனைத்துக் கல்வி நிலையங்களிலும் காமராசர் படம் கட்டாயம் இருக்க வேண்டும். அதுவும் பெரிதாக இருக்க வேண்டும். கல்வி நிலைய நூலகங்களில் காமராசர் பற்றிய நூல்கள் மாணவர்களின் வாசிப்பிற்கு வைக்கப்பட வேண்டும். கல்வி வளர்ச்சி நாளில் காமராசரின் அரும் பெரும் பணிகளை மாணவர்களுக்கு விளக்கிடும் வகையில் நிகழ்ச்சிகள் நடத்தப்பட வேண்டும் என்கிற கோரிக்கைகளை எல்லாம் முன்வைப்பதும் நமது நோக்கமாக இருக்கிறது.

கல்வி கல்லாதவரின் முகத்திலிருப்பவை கண்கள் அல்ல, அவை புண்கள் என்றார் திருவள்ளுவர்.