எனக்கு எல்லாமே இசை தான்!

ஆல் இந்தியா ரேடியோ மற்றும் தூர்தர்ஷனிடமிருந்து A - Top கிரேட் கலைஞர் பட்டத்தைப் பெற்றவரும், தூர்தர்ஷன் மற்றும் பிற தொலைக்காட்சி அலைவரிசை களில் நிகழ்ச்சிகளை வழங்கியவரும், இசையமைப்பாளராக செயல்படுபவரும், இனிமையான குரலை உடையவரும், அநேக விருதுகளை வென்றவருமாகிய கர்நாடக இசைக் கலைஞர் ராஜி கோபால கிருஷ்ணன் பெண்மணிக்காக அளித்த பேட்டி இதோ:

- 

தங்களைப் பற்றியும், தங்கள் குடும்பம் குறித்தும்.....?

மும்பையில் பிறந்து வளர்ந்தவள்நான். பெற்றோர்கள் பி.வி.நடராஜன், லெட்சுமி நடராஜன் இருவருக்கும் பூர்வீகம் கேரளா. எனது தந்தை பி.வி.நடராஜன் நல்ல இசைக் கலைஞர். இவரை ப்ளு ஸ்டார் நடராஜன் என்று எல்லோரும் அழைப்பார்கள். சங்கீத கலாநிதி ஜி.என்.பாலசுப்பிரமணியத்தின் நெருங்கிய நண்பராகிய சங்கீதக் கலைஞர்கல்கத்தாவைத்தியநாத பாகவதரின் சிஷ்யராக, தகப்பனார் இருந்தார்.

அப்போது, கல்கத்தா; மும்பை; வளைகுடா; அமெரிக்கா என அநேக நகரங்களில் இசை நிகழ்ச்சிகளை தந்தை நடத்தியுள்ளார். தந்தையின் வழிகாட்டுதலின் கீழ் சிறு வயலிலேயே நான் இசையைக்கற்க ஆரம்பித்துவிட்டேன். பிறகு மும்பை கிருஷ்ணா மியூசிக் அகாடமியில் சேர்ந்து பயின்றதோடு கிருஷ்ணஸ்வாமி பாகவதரிடமும் பயிற்சி பெற்றேன். இசையில் மேற் பயிற்சியை டி.ஆர். பாலாமணி அம்மாவிடம் மேற்கொண்டேன். அச்சமயம் அநேக சங்கீதப் போட்டிகளில் பங்கேற்று தம்புரா, தங்கப்பதக்கம், வெள்ளி விளக்கு போன்றவைகளை சங்கீத கலாநிதி செம்மங்குடி சீனிவாச ஐயர், செம்பை வைத்யநாத பாகவதர், எம்.எஸ்.சுப்புலட்சுமி அம்மா ஆகியோர் கரங்களினால் பெற்றது மகிழ்ச்சிக்கும், பெருமைக்கும் உரிய விஷயங்களாகும்.

என்னுடைய முதல் அரங்கேற்றம் எனது பதினாறாவது வயதில் மும்பை மைசூர் அஸோஸியேஷனில் குருவின் ஆசியுடன் நிகழ்ந்தது. 1972-ஆம் ஆண்டில், மும்பை பாரதிய இசை மற்றும் கலைச் சங்கத்தில் சங்கீதம் கற்றுக் கொடுக்க ஆரம்பித்தேன். தனிப்பட்ட முறையிலும் அநேக மாணவர்கள் என்னிடம் கற்றனர்.

இசைப் பயணம் விபரங்கள்....?

1977 - ஆம் ஆண்டு பஹ்ரைனுக் குச் சென்றுவிட்டேன். பஹ்ரைன், துபாய், அபுதாபி, குவைத் ஆகிய நாடுகளில் இசைக் கச்சேரிகளை நிகழ்த்தியுள்ளேன். உள்ளூர்வாசிகள் மற்றும் வெளிநாட்டினர் கலந்து கொண்டு பாராட்டினார்கள். அநேக மாணவர்களுக்கு பஹ்ரைனில் சங்கீதம் கற்றுக் கொடுத்தேன்.